რალფ რანგნიკი ავსტრიის ნაკრების მთავარ მწვრთნელად დაინიშნა. ინფორმაცია ოფიციალურად დადასტურდა.
მხარეებს შორის ორწლიანი კონტრაქტი გაფორმდა, რომელიც 2026 წლამდე ავტომატურად იმ შემთხვევაში გახანგრძლივდება, თუ ავსტრიის ნაკრები ევრო 2024-ზე თამაშის უფლებას მოიპოვებს. აღსანიშნავია, რომ რანგნიკი მუშაობას პარალელურად „მანჩესტერ იუნაიტედში“ კონსულტანტის პოზიციაზეც გააგრძელებს.
„ჩემთვის დიდი პატივია ავსტრიის ნაკრების მწვრთნელობა. განსაკუთრებით გერმანიაში გასამართ ევროპის ჩემპიონატზე მოსახვედრად მშიერ გუნდთან ერთად მუშაობა. შემიძლია დავადასტურო, რომ მუშაობას „მანჩესტერშიც“ გავაგრძელებ“, - თქვა რანგნიკმა.
შეგახსენებთ, რომ რალფ რანგნიკი ჯერ კიდევ „მანჩესტერის“ მთავარი მწვრთნელია და სეზონის ბოლოს მას ამ პოზიციაზე ერიკ ტენ ჰაგი შეცვლის. ავსტრიის ნაკრებში მუშაობას კი მაისის ბოლოდან შეუდგება და გუნდს ივნისში გასამართი ერთა ლიგისთვის მოამზადებს.
