საქართველოს საუკეთესო ჩოგბურთელი ნიკოლოზ ბასილაშვილი ინდიან უელსის ფინალში გასვლის შემდეგ კორტზე პირველად გავიდა და ვენის ტურნირში ჩაერთო.

ნიკოლოზ 1/16 ფინალში ესპანელ პაბლო კარენო-ბუსტას, რომელიც რეიტინგის მე-18 ნომერია, დაუპირისპირდა და დაძაბულ ბრძოლაში 2:1 დაამარცხა. შეხვედრა ზუსტად 2 საათსა და 33 წუთს გაგრძელდა.

ბასილაშვილმა პირველ სეტში 7:5 იმარჯვა და გადამწყვეტი იყო ბოლო, მე-12 გეიმში შესრულებული ბრეიკი, რაც სხვათა შორის, სეტში ერთადერთი გახლდათ. მეორე სეტში 29 წლის ქართველი ლიდერობდა, მაგრამ მეცხრე გეიმში საკუთარი ჩაწოდება წააგო და უკუბრეიკი ვეღარ გაახერხა, შედეგად, 4:6 და ანგარიში გათანაბრდა. აი, გადამწყვეტ სეტში ბასილაშვილმა დამაჯერებლად ითამაშა, მართალია, ამჯერადაც სეტის ბედი ერთადერთმა ბრეიკმა გადაწყვიტა, მაგრამ ვინაიდან ეს მერვე გეიმში მაშინ მოხდა, როცა 4:3-ს იგებდა, 5:3 დაწინაურდა, მერე თავის ჩაწოდებაზე უპირატესობა არ გაუნიავებია და პირველივე მატჩპოინტი გამოიყენა.

ნიკოლოზმა 9 ეისი შეასრულა და 4 ორმაგი შეცდომა დაუშვა, ხოლო მის მეტოქეს 12 ეისი და 2 ორმაგი შეცდომა ჰქონდა. ნიკოლოზ ბასილაშვილი მერვედფინალში იტალიელ მატეო ბერეტინის დაუპირისპირდება.

ნიკოლოზ ბასილაშვილი - პაბლო კარენო-ბუსტა 2:1 (7:5, 4:6, 6:3)