მადრიდის „ატლეტიკოს“ თავდამსხმელმა ლა ლიგის ბოლო ტურში „ალავესი“ დაამწუხრა და პროფესიონალურ კარიერაში მე-500 გოლი გაიტანა. აღნიშნული მიღწევის გამო ურუგვაელმა ფორვარდმა გადაწყვიტა გუნდებს, სადაც უთამაშია საჩუქრად 500-500 ბურთი გადასცეს.
სუარესის საჩუქარი ახალგაზრდულ გუნდებზე და მათ შორის ურუგვაის ნაკრებზეც არის გათვლილი. „ელ პისტოლეროს“ აქამდე მონტევიდეოს „ნასიონალში“, „გრონინგენში“, „აიაქსში“, „ლივერპულში“, „ბარსელონასა“ და „ატლეტიკოში“ უთამაშია.
„მინდოდა რაღაც დამებრუნებინა იმ შვიდი გუნდისთვის, რომლებმაც ფეხბურთელად ჩამომაყალიბეს, რომ დაეხმარონ იმ ახალგაზრდებს, რომელთაც მხარდაჭერა და აღჭურვილობა სჭირდებათ, რათა ხელი შეუწყონ თავიანთი ოცნებების ასრულებას. მინდოდა პატივი მიმეგო გუნდებისთვის, ფეხბურთელებისთვის და გულშემატკივრებისთვის, რომლებიც ჩემი თავგადასავლის ნაწილი იყვნენ: „ნასიონალი“, „გრონინგენი“, „აიაქსი“, „ლივერპული“, „ბარსელონა“, „ატლეტიკო“ და ურუგვაის ნაკრები ჩემს გულში არიან და განსაკუთრებული პატივია მათი მხარდაჭერა“, - თქვა სუარესმა.
აქვე გეტყვით, რომ მიმდინარე სეზონში ლუის სუარესს ლა ლიგაში ჩატარებულ 25 მატჩში 19 გოლი აქვს გატანილი, ხოლო ყველა ტურნირზე 31 შეხვედრაში თავი 19-ჯერ გამოიჩინა (სხვა ტურნირში გოლი არ გაუტანია).
