ქუთაისის “ტორპედოს” კაპიტანმა როინ კვასხვაძემ ბულგარულ “ლუდოგორეცთან” (0:1) მატჩის შემდეგ კომენტარი გააკეთა. ქართველი მეკარის განცხადებით, ტაიმის ბოლო წუთზე კონცენტრაცია დაკარგეს და გაშვებული გოლიც ამან გამოიწვია.
გარდა ამისა, კვასხვაძემ აღნიშნა, რომ “ლუდოგორეცთან” ტოლ-სწორად თამაში შესაძლებელია და დასრულებული არაფერია.
“ვფიქრობ, პირველ ტაიმში კარგად ვითამაშეთ, ბურთზე კონტროლიც დამყარებული გვქონდა, მაგრამ თავდაჯერება დაგვაკლდა, რომელიც ასეთი დონის გუნდებთან უნდა გვქონდეს. თუმცა, ჩემი აზრით, არც ახლაა ყველაფერი დაკარგული. გამოჩნდა კიდეც დღეს, რომ შეიძლება თამაში და ყველაფერი შეიძლება მოხდეს. იმედია, მოვახერხებთ და ჯგუფურ ეტაპზე გავალთ.
მე მაინც ვფიქრობ, რომ ახალი შეკრებილი გუნდია და ფიზიკური კონდიციებიც ახლო მომავალში გამოსწორდება. რა თქმა უნდა, არ დავნებდებით და ყველამ დაინახა, რომ შეიძლება ასეთ გუნდებთან თამაში.
ჩემი აზრით, ზოგადად, ქართული ფეხბურთის სენია ბოლო წუთები. ალბათ ეს კონცენტრაციის ბრალია, რომელსაც ვკარგავთ. ბოლო წუთია და სადღაც ვეშვებით და წამიც, რომ მოეშვა ეს საკმარისია. იმედია, გამოვასწორებთ ყველაფერს”, - განაცხადა კვასხვაძემ.
ქუთაისის “ტორპედოსა” და “ლუდოგორეცის” საპასუხო შეხვედრა 30 აგვისტოს, ბულგარეთში გაიმართება.
