ფრანგული “პარი სენ ჟერმენი” მადრიდის “რეალის” თავდამსხმელის კრიშტიანუ რონალდუს გადაბირებას აპირებს. El Confidencial-ის ინფორმაციით, პარიზულ გუნდს პორტუგალიელისთვის პირადი ხელშეკრულება უკვე მზად აქვს.
წყაროს თანახმად, პსჟ კრიშტიანუს სეზონში 60 მილიონ ევროს ჰპრიდება ანაზღაურების სახით. ამასთან, სავარაუდოა, რომ ტრანსფერში ურუგვაელი ედინსონ კავანიც ჩართონ, ფინანსური ფეარ-პლეის პრობლემებისგან თავის ასარიდებლად.
აღსანიშნავია, რომ ბოლო დროს რონალდუს “რეალიდან” შესაძლო წასვლის შესახებ ხშირად იწერება. თავდაპირველი ცნობით, თავად პორტუგალიელმა მოსთხოვა ფლორენტინო პერესს ზაფხულში გუნდიდან გაშვება, ხოლო ცოტა ხნის წინ ესპანური მედია რონალდუსადმი დაინტერესებულ სამ გუნდზე საუბრობდა და მათ შორის ერთ-ერთი ლონდონის “ჩელსი” გახლდათ.
კრიშტიანუ რონალდუ "რეალის" ღირსებას 2009 წლიდან მოყოლებული იცავს, ხოლო მანამდე "მანჩესტერ იუნაიტედსა" და ლისაბონის "სპორტინგში" თამაშობდა.
