საქართველოს ძიუდოისტთა ნაკრები მომავალ უქმეებზე პარიზში გასამართ გრან სლემზე წინასწარ გამოცხადებული 14-კაციანი შემადგენლობის ნაცვლად მხოლოდ 9 სპორტსმენით გამოვა. გუნდი საფრანგეთში მთავარი მწვრთნელის, ირაკლი უზნაძის გარეშე გაემგზავრა, რომელმაც ნაოპერაციები ფეხის მორჩენა ვერ მოასწრო. ძიუდოისტები პარიზში გიორგი ვაზაგაშვილმა და დავით ასუმბანმა იახლეს. რაც შეეხება შემადგენლობის შეთხელებას, ამის შესახებ “მსოფლიო სპორტს” გუშინ თავად უზნაძემ აცნობა. 

“სამწუხაროდ, ბოლო დღეებში უსიამოვნო ამბები მოგვეძალა. პარიზულ ტურნირსა და ერთობლივ სანაკრებო წვრთნებს ჯანმრთელობის მდგომარეობის გამო შალვა ქარდავა (66 კგ), ზებედა რეხვიაშვილი, ნუგზარ ტატალაშვილი (ორივე 73 კგ) და ნოდარ მეტრეველი (100 კგ) გამოაკლდნენ. რეხვიაშვილს ვარჯიშზე კოჭი გადაუბრუნდა და ტრავმის გართულებას მოვერიდეთ. ტატალაშვილს თიაქარი აწუხებს. საბედნიეროდ საოპერაციო არაა, მხოლოდ ათი დღე გაუცდება. ქარდავა ძირმაგარას გამო შეექმნა პრობლემა. მეტრეველს კი მუხლის ძველი ტრავმა გაუმიზეზდა. მას სავარაუდოდ ორ კვირაში, გერმანიის ტურნირზე ვაჭიდავებთ” – განაცხადა ნაკრების მთავარმა მწვრთნელმა. ამ კომენტარის შემდეგ კი გაირკვა, რომ გაციების გამო გრან სლემზე ვერც გიორგი ქალდანი (66 კგ) იჭიდავებს.

ამრიგად, ფრანგულ ტატამზე გამსვლელთა სიაში დარჩნენ: ამირან პაპინაშვილი, ლუხუმ ჩხვიმიანი (ორივე 60 კგ), ავთანდილ ჭრიკიშვილი, უშანგი მარგიანი (ორივე 81 კგ), ვარლამ ლიპარტელიანი, ბექა ღვინიაშვილი (ორივე 90 კგ), იოსებ მსხალაძე (100 კგ), ადამ ოქრუაშვილი და ლევან მატიაშვილი (ორივე +100 კგ).

შაბათს ვაჟთა შორის მედლები 60, 66 და 73 კილოგრამ წონით კატეგორიებში გათამაშდება, ხოლო კვირას – 81, 90, 100 და +100 კილოგრამებში.