გიორგი მერებაშვილმა მშვენივრად ჩაატარა პირველი მატჩი ბერძნულ ოფი-ში. “პანათინაიკოს”-ოფის შეხვედრაში მე-20 წუთზე ლამაზი გოლით გახსნა ანგარიში: ფლანგიდან ჩაწოდებულს ერთი შეხებით დაარტყა და ბურთი ხარიხას რომ მოხვდა, მერე შევარდა კარში.

ოფი-მ ეს მატჩი 2:1 მოიგო, თანაც, ტიტულოვან მეტოქეს აჯობა გასვლაზე. მერებაშვილმა და მეკარე გიორგი ლორიამაც შეუცვლელად ითამაშეს. ოფი-ს 6 მატჩში 9 ქულა აქვს და მე-9 ადგილზეა.

რუსეთის პირველ დივიზიონში გოგიტა გოგუას ხაბაროვსკის სკა-ენერგია შინ აგებდა სანკტ-პეტერბურგის “დინამოსთან”, მაგრამ გოგუამ პენალტით გაათანაბრა ანგარიში და საბოლოოდ, სკა-ენერგიამ 3:1 იმარჯვა. ხაბაროვსკელები მე-12 ადგილზე არიან. გოგუამ შეუცვლელად ითამაშა, მისმა თანაგუნდელმა კახა ალადაშვილმა კი მეორე 45 წუთი გაატარა მინდორზე.

“ტოსნომ” შინ 1:0 მოიგო “ბალტიკასთან”. ნუკრი რევიშვილმა და გიორგი ნავალოვსკიმ 90 წუთი ითამაშეს, ხოლო ოთარ მარცვალაძე და მიხეილ გორელიშვილი სათადარიგოებში იყვნენ და მინდორზე არ შესულან. “ტოსნო” მეოთხე ადგილზეა, ლიდერ “კრილია სოვეტოვს” მხოლოდ სამი ქულით ჩამორჩება.

“სახალინმა”, სადაც სამი ქართველია, სტუმრად 3:5 წააგო “კრილია სოვეტოვთან” და ბოლოდან მესამე ადგილზეა. გიორგი კახელიშვილი ტრავმირებულია, არზიანი და ხოჯავა კი სასტარტოში იყვნენ. არზიანმა ბოლო წუთზე გოლიც გაიტანა – პენალტით შეამცირა სხვაობა. ხოჯავა 75-ე წუთზე შეცვალეს.

ფინეთში, ტურკუს “ინტერმა” სტუმრად 2:2 ითამაშა “მიუპასთან”. ირაკლი სირბილაძემ 90 წუთი ითამაშა, ამჯერად გოლის გარეშე. “ინტერი” მე-9 პოზიციაზეა 12 გუნდს შორის.

თურქეთში, პირველ ლიგაში, “ბოლუსფორმა” 0:0 ითამაშა “ალთინორდუსთან” და მე-12 საფეხურზეა. გიორგი რეხვიაშვილი სასტარტოში იყო და 70-ე წუთზე შეცვალეს.