საფრანგეთის ჩემპიონატის უმაღლესი დივიზიონის, 2025-2026 წლების სეზონის მე-16 ტური განსაკუთრებული გამოდგა ირაკლი აფციაურისთვის. „ლიონის“ 22 წლის უკანახაზელმა „რასინგის“ წინააღმდეგ გამართულ შეხვედრაში TOP 14-ში სადებიუტო ლელო მიითვალა.

ქართველი მორაგბე თამაშში სათადარიგოთა სკამიდან ჩაერთო, თუმცა, მოედანზე შესვლიდან მალევე შეძლო თავის გამოჩენა და მეტოქის ჩათვლის მოედნის აღებით გუნდს მნიშვნელოვანი ქულები მოუტანა. მიუხედავად ამისა, „ლიონმა“ დრამატულ ბრძოლაში გამარჯვება ვერ შეინარჩუნა და პარიზელებთან 34:35 დამარცხდა.

„რასინგის“ შემადგენლობაში თავიდანვე ითამაშა გურამ გოგიჩაშვილმა, რომელმაც სტაბილური და საიმედო თამაშით მნიშვნელოვანი წვლილი შეიტანა მასპინძლების წარმატებაში.

აღსანიშნავია, რომ ირაკლი აფციაური TOP 14-ში უკვე მესამე სეზონს ატარებს. თუ კარიერის დასაწყისში „გრენობლის“ მაისურით მხოლოდ ერთ შეხვედრაში მიეცა თავის გამოჩენის შანსი, „ლიონში“ გადასვლის შემდეგ რეგულარული სათამაშო დრო მოიპოვა და გუნდის ერთ-ერთ მნიშვნელოვან ფიგურად ჩამოყალიბდა.