ესპანეთის ლა ლიგის 29-ე ტურში „ვალენსია“ სტუმრად „ვილიარეალთან“ 0:1 დამარცხდა, მატჩის საუკეთესო ფეხბურთელი წაგების მიუხედავად, გიორგი მამარდაშვილი იყო.
ქართველმა მეკარემ მე-13 წუთზე ზედიზედ ორჯერ იხსნა თავისი გუნდი, როცა რთული დარტყმები უკუაგდო. 38-ე წუთზე სტუმართა კარში პენალტი დაინიშნა, რომელიც ალექს ბაენამ შეასრულა, მაგრამ გიორგიმ დარტყმის მიმართულება გამოიცნო და ბურთი არათუ მოიგერია, ცალი ხელით დაიჭირა! მან მეორედ შეძლო პენალტის აღება ლა ლიგაში.
53-ე წუთზე ქართველმა კიდევ ორჯერ იხსნა თავისი გუნდი, ისევ შესანიშნავი სეივებით. თუმცა, ერთ წუთში ისიც ვერაფერს გახდა, როცა ხორხე კუენკამ გამარჯვების გოლი გაიტანა. მე-80 წუთზე გიორგიმ კიდევ ერთი რთული დარტყმა კუთხურზე მოიგერია.
ლა ლიგამ მატჩის საუკეთესო ფეხბურთელად მამარდაშვილი დაასახელა, რომელსაც მიმდინარე სეზონში ჩატარებულ 28 შეხვედრაში 32 გოლი აქვს გაშვებული, ხოლო კარის მშრალად 9-ჯერ შეძლო, რაც მისთვის ესპანურ კარიერაში საუკეთესო შედეგია.
„ვალენსია“ 40 ქულით ლა ლიგაში მერვე ადგილზეა, მომდევნო ტურში კი, 30 მარტს, „მალიორკას“ შინ დაუხვდება.
