მიუნხენის „ბაიერნში“ მეკარის პოზიციაზე სიტუაცია ისევ გაურკვეველია. კლუბი ეძებს იან ზომერის შემცვლელს, რომელსაც „რეკორდმაისტერიდან“ წასვლა სურს. შვეიცარიელს „ინტერი“ იწვევს.
გიორგი მამარდაშვილი ისევ მთავარ კანდიდატად რჩება, მაგრამ Sky Germany-ს ინფორმაციით, ახლა ბავარიელთა სატრანსფერო სიაში კიდევ ორი მეკარე გაჩნდა: ტომაშ სტრაკოშა და დომინიკ კოტარსკი. ინგლისური „ბრენტფორდისა“ და ბერძნული პაოკ-ის კიპერები გაცილებით იაფი ვარიანტებია, ვიდრე მამარდაშვილი.
ფინანსური კუთხე კი გერმანელთათვის ძალიან მნიშვნელოვანია. ული ჰიონესმა თქვა, რომ კლუბის განზრახვა არ არის მანუელ ნოიერის მემკვიდრე ძვირადღირებული იყოს. თანაც, ჰარი კეინის ტრანსფერზე მუშაობენ, რის გამოც მეკარეში ნაკლები თანხის გადახდა არცთუ უმნიშვნელო ფაქტორი ხდება.
აღსანიშნავია, რომ მიუხედავად მამარდაშვილის აგენტებთან კონტაქტისა, „ბაიერნს“ ჯერ არც ქართველ ფეხბურთელთან აქვს შეთანხმება მიღწეული და არც „ვალენსიასთან“ დაუწყია მოლაპარაკებები, რომელიც ტრანსფერში 30 მილიონი ევროს ითხოვს.
შეგახსენებთ, რომ გიორგი მამარდაშვილი „ვალენსიაში“ 2021 წლიდან თამაშობს და ესპანური კლუბის ღირსება დღემდე 63 შეხვედრაში დაიცვა.
