საქართველოს 21-წლამდე ნაკრების კაპიტანმა ანზორ მექვაბიშვილმა ევროპის ჩემპიონატზე მეოთხედფინალში განცდილ მარცხზე კომენტარი კიდევ ერთხელ გააკეთა. როგორც მან თქვა, მწარეა იმის გააზრება, რომ ტურნირი მათთვის უკვე დასრულდა.
„რთული მისაღები აღმოჩნდა ისრაელთან მარცხი და ძალიან მწარეა იმის გააზრება, რომ ჩვენთვის ეს ტურნირი დასრულდა. ალბათ, ასეთ დროს უკეთესია იცოდე რა დააკელი საქმეს, გუნდურად თუ ინდივიდუალურად, რომ მარცხი უფრო ადვილად ახსნა. ჩვენი შემართება, ერთიანობა, მიზნისკენ სწრაფვა და ტურნირის წარმატებით დასრულების სურვილი იმდენად დიდი იყო, რომ ვფიქრობ ასეთი დასასრული არ დაგვიმსახურებია. ჩვენთან ერთად, არ დაუმსახურებია გულშემატკივარს, რომელმაც დაუჯერებელი ძალა შეგვძინა, რომელმაც ფეხბურთი ჩვენთან ერთად თავიდან შეიყვარა და ჩვენც უფრო მეტად შეგვაყვარა. ეს შეკრება, რომელიც რამაზ სვანაძის ხელმძღვანელობით მთელმა ნაკრებმა გაიარა დაუვიწყარი იქნება. სიყვარული და დამოკიდებულება, რომელიც ერთმანეთის მიმართ გვაქვს, მადლიერება, რომელიც გულშემატკივრის მხარდაჭერამ დაგვიტოვა, უკვალოდ არ ჩაივლის. მადლობას ვუხდი ჩემს ოჯახს მხარდაჭერისთვის, გუნდელებს, მწვრთნელებს, მთელ სტაფს, ქომაგებს და ყველას, ვინც ჩვენი მოგზაურობა დაუვიწყარ ისტორიად აქცია“, - დაწერა მექვაბიშვილმა სოციალურ ქსელში.
შეგახსენებთ, რომ ანზორ მექვაბიშვილი საქართველოს ნაკრების წევრიცაა, სადაც 7 მატჩი აქვს ჩატარებული.
