საქართველოს ნაკრებისა და „ვალენსიას“ მეკარე გიორგი მამარდაშვილს „ინტერს“ იტალიური მედია აქტიურად უკავშირებს.
„ნერაძურის“ კამერუნელი კიპერი ანდრე ონანა შესაძლოა „ჩელსიში“ გადავიდეს, შესაბამისად, იტალიელებს მისი შემცვლელი დასჭირდებათ. Corriere Dello Sport-ის ინფორმაციით, ონანას პოტენციურ შემცვლელთა შორის მამარდაშვილიცაა, რომელიც „ჩელსისა“ და „მანჩესტერსაც“ მოსწონთ.
იტალიური გაზეთის ცნობით, „ვალენსია“ ქართველს 25-30 მილიონ ევროდ აფასებს, გარკვეული ბონუსების დამატებით. წყაროს თანახმად, „ინტერს“ მამარდაშვილი მოსწონს, მიუხედავად იმისა, რომ მისი ტრანსფერი უფრო ძვირი დაუჯდებათ, ვიდრე გულიელმო ვიკარიოს, რომელიც რჩება ონანას შეცვლის ფავორიტად, თუნდაც იმის გათვალისწინებით, რომ „ინტერსა“ და „ემპოლის“ შორის კარგი ურთიერთობაა.
აღსანიშნავია, რომ გუშინ სიმონე ინძაგი მილანური გუნდის ბოსებს შეხვდა და მათგან მომდევნო სეზონისთვის გარკვეული გარანტიები მოითხოვა. მათ შორის, ინძაგის სურს, რომ კლუბმა ონანა შეინარჩუნოს, რომელმაც შესანიშნავი სეზონი ჩაატარა.
შეგახსენებთ, რომ გიორგი მამარდაშვილი "ვალენსიაში" 2021 წლიდან თამაშობს. გასულ სეზონში მან 42 მატჩი ჩაატარა და კლუბთან კონტრაქტი 2027 წლის ზაფხულამდე აქვს გაფორმებული.
