ლონდონის „ვესტ ჰემი“ კონფერენს ლიგის ისტორიაში მეორე ჩემპიონია. დევიდ მოიესის გუნდმა პრაღაში გამართულ ფინალში ფლორენციის „ფიორენტინა“ დაძაბულ ბრძოლაში 2:1 დაამარცხა.

თამაში მთლიანობაში თანაბარი იყო, ვერ ვიტყვით, რომ რომელიმე მოგებას ან წაგებას იმსახურებდა. უფრო დამატებითი დრო იქნებოდა ლოგიკური, მაგრამ ბოლო წუთზე იტალიელებმა დაცვაში შეცდომა დაუშვეს და ეს ძვირად დაუჯდათ.

„ვესტ ჰემი“ 62-ე წუთზე საიდ ბენრაჰმას პენალტით დაწინაურდა, რასაც ფლორენციელებმა 5 წუთში ჯაკომო ბონავენტურას ეფექტური გოლით უპასუხეს. სულ მალე „ვიოლას“ წინ გასვლა შეეძლო, მაგრამ როლანდო მანდრაგორას დარტყმა კარს მცირე მანძილით ასცდა.

და, მაშინ, როცა ყველა დამატებითი დროისთვის ემზადებოდა, ლუკას პაკეტამ საოცარი პასით ლონდონელთა გამარჯვება შექმნა. ბრაზილიელმა მეკარეს პირისპირ ჯარედ ბოუენი შეატოვა, რომელმაც ივარგა და თავისი კლუბისთვის ისტორიული გოლი გაიტანა. „ვესტ ჰემმა“ 1965 წლის შემდეგ პირველად მოიგო ევროთასი.

„ჩაქუჩები“ კონფერენს ლიგის ისტორიაში მეორე გამარჯვებულები არიან, შარშან ეს ტიტული „რომამ“ მოიგო. „ფიორენტინამ“ ბოლო ორ კვირაში მეორე ფინალი წააგო, მანამდე იტალიის თასის ფინალში ასევე დაძაბულ ბრძოლაში „ინტერს“ ვერ გაუმკლავდა.

თავის მხრივ, იტალიურმა გუნდმა მეორე ევროთასის ფინალი წააგო ამ სეზონში: 1 კვირის წინ „რომა“ „სევილიასთან“ ევროპა ლიგის ფინალში დამარცხდა, წინ კი ჩემპიონთა ლიგის ფინალია 10 ივნისს, სტამბოლში: „მანჩესტერ სიტი“ - „ინტერი“.

„ფიორენტინა“ – „ვესტ ჰემი“ 1:2 (0:0)

გოლები: 0:1 ბენრაჰმა (62, პენ), 1:1 ბონავენტურა (67), 1:2 ბოუენი (90)