ლონდონის „ტოტენჰემის“ მთავარმა მწვრთნელმა ანტონიო კონტემ თავის მომავალზე ისაუბრა. როგორც იტალიელმა სპეციალისტმა ამჟამად საქმეზეა ორიენტირებული, მომავალში კი არ იცის, რა მოხდება.
„მომავალი? ყოველთვის ერთსა და იმავე შეკითხვას მეკითხებით და მეც იგივე პასუხი უნდა გაგცეთ. ახლა მთავარია პრემიერლიგაზე ვიყოთ კონცენტრირებული, არაერთხელ მითქვამს, რომ საკმარისად კონკურენტუნარიანი არ ვართ, ამას დიდი ხანია ვამბობ.
დრო და მოთმინებაა საჭირო, მაგრამ ვამჩნევ, რომ ირგვლივ რეალობის დანახვა არ სურთ. კლუბმა ძალიან კარგად იცის, როგორია ჩემი მდგომარეობა და იცის, რას ვფიქრობ. სასწაულებს ვერ მოვახდენთ, ვნახოთ რა მოხდება მომავალში. მზად ვარ ამ კლუბისთვის მოვკვდე, მაგრამ იმდენად სულელი არ ვარ, რომ თვითმკვლელობა ჩავიდინო. რიშარლისონმა თქვა, რომ საშინელი სეზონია? ვეთანხმები, მართალია, მას საშინელი სეზონი აქვს“, - თქვა კონტემ.
შეგახსენებთ, რომ ლონდონის „ტოტენჰემთან“ ანტონიო კონტეს კონტრაქტი მიმდინარე სეზონის ბოლოს ეწურება.
