„ნაპოლის“ მთავარმა მწვრთნელმა ლუჩანო სპალეტიმ „რეინჯერსთან“ მოგების (3:0) შემდეგ კომენტარი გააკეთა. როგორც მან აღნიშნა, ამ „ნაპოლით“ დიეგო მარადონა იამაყებდა.

გარდა ამისა, სპალეტიმ ხვიჩა კვარაცხელიაზეც ისაუბრა და თქვა, რომ თამაშში მის ჩართვას აპირებდა, მაგრამ მესამე გოლის შემდეგ გადაიფიქრა, რაზეც ხვიჩას დადებითი რეაქცია ჰქონდა და მისი გადაწყვეტილება პროტესტის გარეშე მიიღო.

„ბედნიერი ვარ ამ საოცარი გუნდური სულისკვეთებით, რომელსაც ყველა მატჩში ვაჩვენებთ. ეს ბიჭები ისე ვარჯიშობენ, როგორც საუკეთესო პროფესიონალები და როცა სათამაშო დრო ეძლევათ, თავიანთ შესაძლებლობებს ამტკიცებენ. მე მყავს გუნდში, რომლებიც ტოტალურ ხელმისაწვდომობას აჩვენებენ, ყველა მზადაა გუნდს ნებისმიერ მომენტში დაეხმაროს.

„ლივერპული“? მის წინააღმდეგ თამაში ძალიან რთულია. ნებისმიერ შემთხვევაში „ენფილდზე“ ნამდვილი შოუ იქნება, მინიფინალი, რომელშიც თამაში დავიმსახურეთ, თუმცა პირველ რიგში „სასუოლოსთან“ მატჩზე უნდა ვიფიქროთ.

კვარაცხელიას თავიდან დავუძახე, რომ თამაშში ჩართულიყო, ბოლო 15 წუთი თამაში შეეძლო და ბურთის შენარჩუნება გვჭირდებოდა, მაგრამ მერე ანგარიში 3:0 გახდა და სათადარიგო სკამზე დაბრუნება ვთხოვე, რაზეც სიტყვა არ უთქვამს და დამეთანხმა. ეს მოწმობს ყველას მხრიდან ხელმისაწვდომობას და გუნდურობას, რომლის მსგავსი ჩემს კარიერაში თითქმის არ მქონია. მარადონას „ნაპოლის“ რეკორდი გავაუმჯობესეთ? დიეგო ამ გუნდით იამაყებდა“, - თქვა სპალეტიმ.

შეგახსენებთ, „ნაპოლიმ“ ზედიზედ 12 მატჩი მოიგო და კლუბის ისტორიაში რეკორდი დაამყარა. მომდევნო მატჩს ნეაპოლიტანელები 29 ოქტომბერს, „სასუოლოსთან“ გამართავენ.