ბრიტანელ ჩოგბურთელ ემა რადუკანუსთვის მიმდინარე სეზონი უკვე დასრულდა. ამის მიზეზი მაჯის ტრავმაა, რომლის მკურნალობასაც იმაზე მეტი დრო დასჭირდება, ვიდრე ექიმები ვარაუდობდნენ.
WTA-ს ტურის წლევანდელი სეზონის დროს, რადუკანუს იმდენივე სამედიცინო ბიულეტენი აქვს გახსნილი, რამდენი თამაშიც მოიგო. არადა, იუნიორობისას, ტრავმებისადმი მედეგ ჩოგბურთელად ითვლებოდა. მარამ პროფესიონალებში მისი პირველივე სრული სეზონი, ტრავმების გამო არაერთხელ შეწყდა.
რადუკანუს ამ კვირაში რუმინეთში უნდა ეთამაშა, საიდანაც არის მამამისი. მომდევნო კვირაში კი მექსიკის ქალაქ გვადალახარაში გამოსვლას გეგმავდა, სადაც WTA-ს რეგულარული სეზონის ბოლო ტურნირი გაიმართება. ჯერ გადაწყვეტილი არაა, შეძლებს თუ არა თამაშს ბილი ჯინ კინგის თასის ფინალში, რომელიც 8-13 ნოემბერს გაიმართება.
ამ სეზონში რადუკანუ პირველივე წრეში რვა ტურნირს გამოეთიშა. ოსტრავას ამ კვირის ტურნირზე, მას მაჯის ტრავმის ნიშანწყალიც არ ეტყობოდა. მაგრამ შემდეგ ტკივილი დაეწყო. ამ სეზონში მან ტრავმის გამო, ოთხი შეხვედრის დასრულება ვერ შეძლო. ერთი ტრავმა იმის გამო მიიღო, რომ სპორტული ფეხსაცმელი ოდნავ თავისუფლად ჰქონდა.
სეზონის განმავლობაში მას ჰქონდა წელის, ტერფის, მუცლის კუნთების, თეძოს, საჯდომის კუნთის, ბარძაყის და ბოლოს მაჯის ტრავმა მიიღო. ის ხშირად იმეორებს, რომ ამტანობის გასაუმჯობესებლად, მეტი ვარჯიში სჭირდება.
რადუკანუმ სეზონი რეიტინგში მე-18 საფეხურზე დაიწყო, მაგრამ ამჟამად 67-ე ადგილამდეა ჩამოქვეითებული. WTA-ს მიმდინარე სეზონში მას 16 მოგება და 18 წაგება აქვს. შედარებისთვის, გასულ სეზონში 12 მოიგო და 5 წააგო. და ეს საკმარისი აღმოჩნდა იმისთვის, რომ აშშ-ის ღია პირველობის ჩემპიონი გამხდარიყო.
