აშშ-ის ღია პირველობის ფინალში ერთმანეთს პოლონელი იგა სვიატეკი და ტუნისელი ონს ჟაბური დაუპირისპირდებიან. მსოფლიოს პირველმა ჩოგანმა ბელარუს არინა საბალენკას 3-6, 6-1, 6-4 მოუგო, ჟაბურმა კი ფრანგი კაროლინ გარსია 6-1, 6-3 დაამარცხა.
სვიატეკმა თამაში ცუდად დაიწყო და პირველი სეტი დათმო. თუმცა შემდეგ სრულად გადაეწყო, აგრესიულად ათამაშდა და საწადელსაც საკმაოდ იოლად მიაღწია. თამაშის შემდეგ მან განაცხადა, რომ შეხვედრის დასაწყისში, ვერაფერი მოუხერხა ემოციებს და წაგების პანიკურ შიშს. მაგრამ პირველი სეტის წაგებამ, შიში დაავიწყა და თამაშის გამოსწორებაც შეძლო.
დიდი სლემის ორი ტიტულის (ორივე საფრანგეთში აქვს მოპოვებული) მფლობელი აღიარებს, რომ ჯერაც იმას სწავლობს, თუ როგორ უნდა ენდოს საკუთარ თავს, როცა ამერიკულ სწრაფ ჰარდზე თამაშობს.
ჟაბური პირველი ქალი ჩოგბურთელია აფრიკის კონტინენტიდან, ვინც პროფესიონალური ჩოგბურთის ეპოქაში, ფლეშინგ მედოუსზე ფინალში გასვლა შეძლო. მან გარსიას განდგურება პირველივე გეიმიდან დაიწყო და პირველი სეტი 23 წუთში მოიგო.
გარსიამ მეორე სეტში თამაში გააუმჯობესა, მაგრამ უკვე გვიან იყო. მან ვერც თავისი მთავარი იარაღი - ძლიერი მოწოდება გამოიყენა და მეოთხე გეიმში, მეტოქეს ბრეიკის საშუალებაც მისცა. ჟაბურმ დიდი სლემის ზედიზედ მეორე ტურნირის ფინალს მიღწია. ის პირველი არაბი ქალი ჩოგბურთელია, ვინც დიდი სლემის ტურნირის ფინალში (უიმბლდონზე) ითამაშა და ახლა ეს მიღწევა გაიმეორა. თავისი მიღწევების გამო, მას ტუნისში „ბედნიერების მინისტრი“ შეარქვეს.
