საქართველოს ნაკრების კალათბურთელი თორნიკე შენგელია მოსკოვის ცსკა-დან წასვლის შემდეგ ახალ გუნდს ეძებს და ორი ვარიანტი აქვს - ესპანეთსა და იტალიაში.

იტალიური მედიის ცნობით, თორნიკეს დამატება „ბოლონია ვირტუსს“ სურს. აღსანიშნავია, რომ იტალიელებმა ორი დღის წინ ოფიციალურად დაადასტურეს იტალიელი დანიელ ჰაკეტის ტრანსფერი, რომელიც სწორედ ცსკა-ში თამაშობდა, მაგრამ რუსული კლუბი ომის შემდეგ დატოვა.

„ბოლონია“ ევროთასზე თამაშობს, სადაც სატრანსფერო ფანჯარა 8 მარტს იხურება და იტალიელებს დრო აქამდე აქვთ. შენგელიას მეორე ვარიანტი ესპანური „ვალენსიაა“, რომლის რიგებში მას 2008-2010 წლებში კარიერის სტარტზე უკვე აქვს ნათამაშები.

აქვე ისიც ვთქვათ, რომ მანამდე თორნიკე თავის ყოფილ კლუბს, „ბასკონიას“ დაუკავშირეს, მაგრამ ბასკურ გუნდში დაბრუნება პრაქტიკულად გამორიცხულია ეკონომიკური მიზეზების გამო და ამასთან, იმიტომ, რომ ქართველი მძიმე ფორვარდი „ბასკონიას“ მიმდინარე სეზონში მხოლოდ ლიგა ენდესაში თუ დაეხმარებოდა, რადგან ევროლიგაზე ამ სეზონში სხვა გუნდის რიგებში უკვე უთამაშია.

შეგახსენებთ, რომ მიმდინარე სეზონში თორნიკე შენგელია ევროლიგაში საშუალოდ 12.7 ქულას, 4.7 მოხსნას და 2.5 პასს აგროვებდა.