კვიპროსის ჩემპიონატის 22-ე ტურში ნიქოზიის „აპოელმა“ სტუმრად „ომონიას“ 4:2 მოუგო, გიორგი ქვილითაიამ დუბლი შეასრულა და ერთი გოლი უკრაინას მიუძღვნა.

28 წლის ფეხბურთელმა ანგარიში მე-19 წუთზე გახსნა. მან ბურთი მოედნის ცენტრში მოიპოვა კონტრშეტევაზე, მეკარესთან პირისპირ გავიდა და გაიტანა. გოლისთანავე სათადარიგო სკამთან მიირბინა, სადაც უკრაინის დროშა მისცეს და უკრაინელ ხალხს მხარდაჭერა გამოუცხადა, ისევე, როგორც მისმა თანაგუნდელებმა.

ქვილითაიამ დუბლი 55-ე წუთზე მიითვალა, როცა პენალტი გაიტანა და იმ დროისთვის ანგარიში 3:0 გახადა. საბოლოოდ, „აპოელმა“ 4:0 მოიგო. ამ შეხვედრაში განაცხადში არ იყვნენ თორნიკე ოქრიაშვილი და მურთაზ დაუშვილი, ხოლო ქვილითაია 67-ე წუთზე შეცვალეს.

გიორგი კვიპროსის ჩემპიონატის ბომბარდირთა დავას 10 გოლით ლიდერობს. ამასთან, 2 გოლი თასის გათამაშებაში აქვს გატანილი და შეგვიძლია ვთქვათ, რომ კარგ სეზონს ატარებს. ეს დიდწილად 2022 წლის დამსახურებაა, რადგან 12-დან 8 გოლი სწორედ მიმდინარე წელს მიითვალა.

„აპოელი“ 39 ქულით სატურნირო ცხრილში მეორე ადგილზეა და საჩემპიონო ექვსეულში გააგრძელებს ასპარეზობას.