როჯერ ფედერერს მუხლი ისევ ღალატობს. შვეიცარიელმა ჩოგბურთელმა ინსტაგრამზე გამოქვეყნებული ვიდეოთი გვამცნო, რომ მუხლზე, რომელზეც ორი ოპერაცია აქვს გაკეთებული და ამის გამო, თვეები გაუცდა, კიდევ ერთი ოპერაციის გაკეთება მოუწევს.
40 წლის ჩოგბურთელი ვიდეოში თავის გასიებულ მუხლს გვიჩვენებს, რაც დასტურია იმისა, რომ ტრავმამ კვლავ შეაწუხა. ამით გაირკვა ის, რომ ფედერერი აუცილებლად გამოტოვებს აშშ-ის ღია პირველობას და შესაძლოა, ამ სეზონში კორტს აღარც დაუბრუნდეს. უფრო მეტიც, დიდია შანსი იმისა, რომ კარიერა დაასრულოს.
ფედრერის თქმით, ოპერაციის შემდეგ, არაერთ კვირას ყავარჯნებით ივლის, კორტზე კი თვეების განმავლობაში ვერ გამოვა. ამასთან დასძენს, რომ კარიერის დასრულებაზე ჯერ არ ფიქრობს. თუმცა იმასაც აცნობიერებს, რომ მის ასაკში, სრულფასოვანი დაბრუნება ძნელი იქნება.
„მინდა, საკუთარ თავს იმის იმედი დავუტოვო, რომ ტურზე რაღაც სახით დავბრუნდები. მე რეალისტი ვარ, ცუდად ნუ გამიგებთ. ვიცი, რაოდენ რთულია ამის გაკეთება ჩემს ასაკში. კიდევ ერთი ოპერაცია და მერე ისევ დაბრუნება“, - ამბობს ფედერერი და დასძენს, რომ ჯანმრთელობა და ბრძოლის უნარი, გამოჯანმრთელებაში და უმაღლეს დონეზე კიდევ ერთხელ დაბრუნებაში დაეხმარება.
