უნგრეთის დედაქალაქ ბუდაპეშტში მიმდინარე მსოფლიოს ჩემპიონატზე ძიუდოში ქართველი ძიუდოისტები ასპარეზობას გამოეთიშნენ. მეხუთე საშეჯიბრო დღეს ტატამზე ორი ჩვენებური გავიდა, მაგრამ წარმატებას ვერ მიაღწიეს.
90 კგ წონით კატეგორიაში ბექა ღვინიაშვილი პირველი წრისგან თავისუფალი იყო და შეჯიბრიში მეორე წრიდან ჩაერთო, სადაც შვეიცარიელ სირილ გროსკლაუსს დაუპირისპირდა და იპონით იმარჯვა, მაგრამ ილეთის შესრულების დროს ფეხის ჩახვევა გააკეთა და მსაჯებმა ტურნირიდან მოხსნეს, რადგან ძიუდოში ეს აკრძალულია. ამრიგად, ბექა მსოფლიოს ჩემპიონატს გამოეთიშა და უმედლოდ დარჩა.
ქალთა შორის 70 კგ წონით კატეგორიაში მარიამ ჭანტურიამ გაბონელი კარენ აგონო ვორა დაამარცხა, მაგრამ მეორე წრეში გერმანელ მირიამ ბუტკერაიტთან მარცხი განიცხადა.
შეგახსენებთ, რომ საქართველოს აქტივში ამ დროისთვის ლაშა შავდათუაშვილის ოქროს და ტატო გრიგალაშვილის ვერცხლის მედლებია.
11 ივნისს ტატამზე 100 კგ წონით კატეგორიაში ორი ქართველი ძიუდოისტი გავა. ვარლამ ლიპარტელიანი მეორე წრიდან ჩაერთვება და ავსტრიელ აარონ ფარასა და ნიდერლანდელ სიმეონ კათარინას შორის გამარჯვებულს შეხვდება, ხოლო ილია სულამანიძე პირველ წრეში თურქ მერთ სისმანლარს გაეჯიბრება.
