სლოვენიელმა პრიმოჟ როგლიჩმა კიდევ ერთხელ დაამტკიცა, რომ მსოფლიოში ერთ-ერთი საუკეთესო საგზაო ველომრბოლია. დღეს მან ბასკეთის ტურის ბოლო ეტაპი მდევრის როლში დაიწყო და გამარჯვებით დაასრულა. მისმა გუნდმა „ჯუმბო ვისმამ“ კი ყველა კატეგორიის მაისური დაისაკუთრა.
ბოლო, სამთო ეტაპი ფრანგმა დავიდ გაუდუმ (გრუპამა-FDJ) მოიგო, ვისთან ერთადაც, ფინიშის ხაზი როგლიჩმაც გადალახა. მდევრების ოთხკაციან ჯგუფში კი საუკეთესო ვეტერანი ესპანელი, ალეხანდრო ვალვერდე (მოვისტარი) იყო, რომელმაც უკან მოიტოვა ბრიტანელი ადამ იეიტსი (იენოს გრენადერსი), ტურ დე ფრანსის სლოვენიელი ჩემპიონი ტადეი პოგაჩარი და როგლიჩის დანიელი თანაგუნდელი იონას ვინგეგაარდი.
ფინიშამდე 35 კილომეტრი რომ რჩებოდა, გაუდუმ, როგლიჩმა და ბრიტანელმა ჰიუ კართიმ (EF ედუქეიშნ-ნიპპო) ექვსი მდევრის, მათ შორის, პოგაჩარის და იეიტსის, ჩამოტოვება სცადეს, მაგრამ შორს ვერ წავიდნენ. ბოლო აღმართ უსარტცაზე როგლიჩმა ტემპს მოუმატა. კართი ჩამორჩა, გაუდუ კი სლოვენიელს მიჰყვა. დისტანციის მიწურულს, პოგაჩარმა შეტევა დაიწყო, მაგრამ დაწინაურებულების დაწევა არ გამოუვიდა.