პორტუგალიის ნაკრების მთავარმა მწვრთნელმა კრიშტიანუ რონალდუს შესახებ ისაუბრა და განაცხადა, რომ ის ნაკრების კაპიტნად რჩება. მას ამის შესახებ მას მერე ჰკითხეს, რაც რონალდუ სერბეთთან თამაშის ბოლოს კაპიტნის სამკლაური ძირს მოისროლა.

„ეს მხოლოდ დიდი იმედგაცრუების მომენტი იყო. კრიშტიანუ ყოველთვის იქნება კაპიტანი, ის არის ეროვნული ნაკრების მაგალითი, ამას ყველა მოთამაშე ამბობს. მუშაობით, ვარჯიშებით, ყველაფრით მაგალითია. კრიშტიანუს შეურაცხყოფა მწვრთნელზე რომ მიეყენებინა, თანაგუნდელებზე ან ფედერაციისთვის, ამაზე ვიფიქქრებდით, მაგრამ მსგავსი არაფერი მომხდარა. ნებისმიერისთვის, ვისაც გამარჯვება სურს, ეს დიდი იმედგაცრუების მომენტი იქნებოდა. ის ყველაფერს აკეთებს ეროვნულ ნაკრებში, თამაშიდან 10 წუთში პოსტიც გამოაქვეყნა. არავინ ამბობს, რომ ეს ლამაზი ჟესტი იყო, მაგრამ თუ მეკითხებით, რონალდუ მაინც კაპიტანი იქნება, დარწმუნებით გპასუხობთ, რომ კი“, - თქვა სანტუშმა.

შეგახსენებთ, რონალდუს გაბრაზება მსაჯის გადაწყვეტილებამ გამოიწვია, რომელმაც მას აშკარა გოლი არ ჩაუთვალა და პორტუგალიამ სერბეთში 2 ქულა დაკარგა (2:2).