ძიუდო

16:57 | 20.11.2020 | ნანახია [] - ჯერ

სამი მედლის რეალური შანსი ევროპის ჩემპიონატზე

ჩეხეთის დედაქალაქ პრაღაში მიმდინარე ევროპის ჩემპიონატზე ძიუდოში მეორე საშეჯიბრო დღე პირველისგან განსხვავებით საქართველოსთვის ჯერჯერობით კარგად მიმდინარეობს. დღეს ტატამზე ლაშა შავდათუაშვილი (73 კგ), ლუკა მაისურაძე (81 კგ) და ტატო გრიგალაშვილი (81 კგ) გავიდნენ. მედლისთვის სამივე მათგანი იბრძვის.

შავდათუაშვილმა პირველ შეხვედრაში გერმანელი ანტონი ზინგი დაამარცხა, რასაც პოტუგალიელ ჟოაო ფერნანდოსთან და მისთვის უხერხულ მეტოქესთან, აზერბაიჯანელ რუსტემ ორუჯოვთან გამარჯვება მიაყოლა და ნახევარფინალში გავიდა. ფინალის საზგურისთვის ლაშა იტალიელ ფაბიო ბაზილეს გაეჯიბრა და 56 წამში იპონით დაამარცხა. ქართველი ძიუდოისტი ფინალში მოლდოველ ვიქტორ სტერპუს დაუპირისპირდება.

გრიგალაშვილმა პირველ წრეში იტალიელი კრისტიან პარლატი დაამარცხა, რასაც ბერძენ თეოდოროს დემუტრიდისთან გამარჯვება მოჰყვა, ხოლო მაისურაძემ ჯერ მოლდოველი ნიკონ ზაბოროსჩიუსი და შემდეგ უკრაინელი არტემ ბუბირი დაამარცხა. შედეგად, ქართველი ძიუდოსტები ერთმანეთს მეოთხედფინალში გადაეყარნენ, სადაც გამარჯვება გრიგალაშვილს დარჩა და ნახევარფინალში გავიდა. ტატომ ნახევარფინალურ სტადიაზე ბელგიელ მატიას კასს სძლია და ფინალშია. მაისურაძემ კი რეპეშაჟში გადაინაცვლა და პირველი ბრძოლა აზერბაიჯანელ მურად ფატიევთან მოიგო, რის შედეგადაც ბრინჯაოს მედლისთვს ბრძოლის უფლება მოიპოვა.

გრიგალაშვილი ფინალში ბულგარელ ივაილო ივანოვს შეხვდება, ხოლო მაისურაძე ბრინჯაოს მედლისთვის ნიდერლანდელ ფრანკ დე ვიტს დაუპირისპირდება. ფინალური ბლოკი 19:00 საათზე დაიწყება და "პირველი არხის" პირდაპირ ეთერში გადაიცემა.

0.119331