მიუნხენის "ბაიერნის" მთავარი მწვრთნელი ჰანსი ფლიკი იმედოვნებს, რომ დავიდ ალაბა კლუბთან ახალ კონტრაქტს გააფორმებს. ავსტრიის ეროვნული ნაკრების ფეხბურთელს გერმანელებთან ხელშეკრულება 2021 წლის ივლისამდე აქვს გაფორმებული და შემდეგ წელს კლუბს თავისუფალი აგენტის სტატუსით დატოვებს.
28 წლის ფეხბურთელი "ბაიერნში" 2008 წლიდან იმყოფება. მხარეებს შორის მოლაპარაკების რამდენიმე რაუნდი აქამდე ჩაიშალა და შეთანხმებას ვერ აღწევენ. გერმანელებს შანსი აქვთ ზამთარში ფეხბურთელი გაყიდონ და ფინანსური სარგებელი ნახონ.
"ვიმედოვნებ, ალაბა კლუბთან ახალ ხელშეკრულებას გააფორმებს, რადგან დავიდმა იცის თუ როგორი სიტუაციაა კლუბში. გუნდში კარგი ატმოსფეროა და წარმატებულად ვთამაშობთ. ესაა კლუბი, რომელიც მსოფლიოში ერთ-ერთ საუკეთესოდ ითვლება. ალაბა აღნიშნულ სიტუაციაზე ფიქრობს, თუმცა ჩვენ ყველა გადაწყვეტილებას პატივი უნდა ვცეთ. ვიმედოვნებ, რომ იგი დარჩება, თუმცა ეს უპირველეს ყოვლისა მისი გადასაწყვეტია." - განაცხადა ფლიკმა პრესკონფერენციაზე.
ალაბამ წლების განმავლობაში "ბაიერნის" მაისურით 393 მატჩი ჩაატარა, გაიტანა 31 გოლი და 49 საგოლე გადაცემა შეასრულა. დავიდმა "რეკორდმაისტერის" შემადგენლობაში ბუნდესლიგა ცხრაჯერ მოიგო, ხოლო ჩემპიონთა ლიგა - ორჯერ.
