მიუნხენის „ბაიერნის“ მთავარმა მწვრთნელმა ჰანსი ფლიკმა „ბარსელონასთან“ მატჩამდე პრესკონფერენცია გამართა. გერმანელი სპეციალისტის განცხადებით, მისი გუნდი „ბარსელონას“ წინააღმდეგ ითამაშებს და არა ლიონელ მესის.

თუმცა, ფლიკს კარგად ესმის, რომ მთავარი საფრთხე სწორედ არგენტინელი ფეხბურთელისგან მოდის.

„ლევანდოვსკის და მესის ვერ შევადარებთ, რობერტო არაჩვეულებრივი, ხარისხიანი თავდამსხმელია, ყოველთვის გაიტანს გოლებს, შეუძლია საგოლე პასების გაკეთება. თუმცა, მესი ბოლო წლების საუკეთესო ფეხბურთელია მსოფლიოში.

მაგრამ მომავალი მატჩი არ არის „ბაიერნი“ მესის წინააღმდეგ, არამედ „ბაიერნი“ – „ბარსელონა“. რა თქმა უნდა, მესის შეჩერების გეგმა გვაქვს, თუმცა საჯაროდ ამას არ გამოვაცხადებ. გუნდური თამაში მნიშვნელოვანია, უნდა დაველოდოთ მის მოქმედებებს, ჩავკეტოთ სივრცეები, მოვახდინოთ ზეწოლა მასზე და არ დავტოვოთ ერთი-ერთზე“, - თქვა ფლიკმა.

შეგახსენებთ, „ბარსელონასა“ და „ბაიერნის“ შეხვედრა 14 აგვისტოს, თბილისის დროით 23:00 საათზე დაიწყება.