ესპანური „ბასკონია“ თორნიკე შენგელიას დაემშვიდობა. კლუბმა ქართველ კალათბურთელს გამოსამშვიდობებელი პრესკონფერენცია მოუწყო, სადაც ჩვენებურმა განაცხადა, რომ ვიტორია მისი სახლია და მომავალში დაბრუნებაც არ გამორიცხა.

„ადვილი არ იყო აქ დამკვიდრება. ტრავმების და საკუთარი თავის პოვნის გამო. ბევრი ფიზიკური და მენტალური დაბრკოლება იყო, მაგრამ ამ 6 წლის განმავლობაში გავიზარდე, როგორც კალათბურთელი, როგორც პიროვნება და მამა. მადლობას ვუხდი კლუბს, ქალაქს, რადგან ეს ჩემი ცხოვრების მნიშვნელოვანი ნაწილია. ჩემი შვილები ყოველთვის მეკითხებიან როდის ვბრუნდებით ვიტორიაში. სამწუხაროა, რომ ქომაგებთან არ შემეძლო სრულყოფილი დამშვიდობება მე არ ვხურავ კარს, ეს ჩემი მეორე სახლია, აქ თავს კარგად ვგრძნობდი. არასდროს ვიცით რა მოხდება მომავალში“, - თქვა თორნიკემ.

შენგელიას პრესკონფერენციაზე იმ აჟიოტაჟზეც ჰკითხეს, რაც ცსკა-ში მისმა ტრანსფერმა საქართველოში გამოიწვია:

„თავს კარგად ვგრძნობ, ეს ყველაფერი ჩემზე არ მოქმედებს, რადგან ჩემმა ოჯახმა და ადამიანებმა, რომლებიც მიცნობენ, კარგად იციან, ვინც ვარ და ვინც არ მიცნობს, კრიტიკის მიზეზიც არ აქვთ“, - დასძინა ქართველმა კალათბურთელმა.

შეგახსენებთ, შენგელიამ „ბასკონიაში“ 2014 წლიდან 318 თამაში ჩაატარა და ცოტა ხნის წინ ესპანეთის ჩემპიონის ტიტული მოიპოვა. თორნიკემ რამდენიმე დღის წინ მოსკოვის ცსკა-სთან კი 3-წლიანი კონტრაქტი გააფორმა.