„დინამო თბილისის“ ნახევარმცველის ნიკა ნინუას სტამბოლის „ბეშითქაშში“ შესაძლო ტრანსფერის შესახებ ქართული და თურქული მედია ერთდროულად წერს.

ამ საკითხთან დაკავშირებით „დინამოს“ პრესსამსახურს დავუკავშირდით, სადაც დაადასტურეს, რომ ნინუას რამდენიმე კლუბი ეპატიჟება, მაგრამ ამ ეტაპზე დაკონკრეტებისგან თავი შეიკავეს. გარდა ამისა, ცნობა თითქოს, კლუბი უკვე დატოვა, უარყვეს.

„ნინუას მიმართ რამდენიმე კლუბი ინტერესს შარშანაც იჩენდა და ახლაც იჩენს. არაა გამორიხული „დინამო“ დატოვოს, მოლაპარაკებები მიმდინარეობს, მაგრამ ჯერჯერობით გადაჭრით არაფრის თქმა შეგვიძლია. გვინდა განვაცხადოთ, რომ ნიკას ამ ეტაპზე თბილისი არ დაუტოვებია, კლუბთან ერთადაა და ბაზაზე ემზადება“, - გვითხრეს „დინამოში“.

ამასთან, ნაკლებ სავარაუდოა, რომ ნინუა 25 ივნისს, კრისტალბეთ ეროვნული ლიგის მესამე ტურში ითამაშებს. აქვე გეტყვით, რომ 21 წლის ნახევარმცველს „დინამოს“ რიგებში ჩატარებულ 94 მატჩში 14 გოლი აქვს გატანილი, 15-ჯერ კი საგოლე პასი მიითვალა. კლუბთან კონტრაქტი 2020 წლის 31 დეკემბრამდე აკავშირებს.

გარდა ამისა, „დინამო თბილისი“ დატოვა განელმა თავდამსხმელმა კვამე კარიკარიმ, რომელმაც 2019 წელს, დედაქალაქური კლუბის მაისურით ეროვნულ ლიგაში ჩატარებულ 8 მატჩში 2 გოლი გაიტანა. სამაგიეროდ, საქართველოში დაბრუნდნენ ფილიპ ორშულა და საიმონ ბენიო, თუმცა ხვალინდელ მატჩში „საბურთალოსთან“ ვერცერთი ითამაშებს, რადგან 2-კვირიან სავალადებულო კარანტინში იმყოფებიან.

შეგახსენებთ, კრისტალბეთ ეროვნული ლიგა 25 ივნისს „საბურთალოსა“ და „დინამო თბილისის“ მატჩით განახლდება.