ბელგიის იუპილერ ლიგაში ზედიზედ მეორე შეხვედრაში გიორგი ქვილითაიამ საგოლე პასი მიითვალა. ქართველმა ფორვარდმა წინა ტურში დეპუატრს გაატანინა, დღეს - ანდერსონ ნიანგბოს.
„გენტის“ მთავარი მწვრთნელი იეს თორუპი ქართველებს მაინც და მაინც საიმედო თვალით არ უყურებს. რომან იარემჩუკს მძიმე ტრავმა აქვს, მაგრამ გიორგი ქვილითაიას ძირითად შემადგენლობაში მაინც არ ენდობა. იმის მიუხედავად, რომ ჩვენებური ერთი კვირის წინ სასტარტოში იყო და როგორც უკვე ვთქვით, საგოლე გადაცემა შეასრულა, ახლა „გენკთან“ მაინც თადარიგში დატოვა.
ოდენ მსაჯის მიერ კომპენსირებულ პირველ წუთზე მისცა მოედანზე შესვლის შესაძლებლობა და ამის მიუხედავად, თანაგუნდელს ამჯერადაც გაატანინა. მსაჯის კომპენსირებულ მეოთხე წუთზე საგოლე შეტევა თავად დაიწყო, შესანიშნავად ითამაშა და ნიანგბოს იდეალური პასი გაუკეთა, რომელმაც გაიტანა.
რაც შეეხება გიორგი ჩაკვეტაძეს, გასაგებია, რომ ჩვენებური მძიმე ტრავმის შემდეგ იდეალურ სათამაშო კონდიციაში არ იმყოფება, მაგრამ უკვე თვენახევარზე მეტი გავიდა, რაც პირველად ითამაშა და თორუპი მეტად მწირ დროს აძლევს. უფრო მეტიც, პრაქტიკულად არ ათამაშებს, ახლაც ასე იყო - 90 წუთი სათადარიგო სკამზე დატოვა. უთამაშებლად კი, ქართველი შემტევი ძველებური ფორმის დაბრუნებას ნამდვილად ვერ მოახერხებს. მოკლედ, პირდაპირ რომ ვთქვათ, დანიელი სპეციალისტი ჩვენებურებს არ სწყალობს.
„გენტს“ კი, მოწინავე ექვსეულში მოხვედრა თითქმის გარანტირებული აქვს, ამ დროისთვის 45 ქულით მეორე ადგილზეა და მხოლოდ „ბრიუგეს“ ჩამორჩება.
