საქართველოს 18-წლამდე კალათბურთელთა ნაკრებმა ქალაქ ვალმეირაში ლატვიასთან საკონტროლო მატჩი გამართა და დაძაბულ ბრძოლაში – 71:72 დამარცხდა. თემურ კანკიასა და ნიკა ცინცაძის გაწვრთნილი გუნდი მთელი მატჩის განმავლობაში უგებდა მასპინძლებს და შეხვედრა ბოლო წამებზე დათმო.

პირველი პერიოდი ქართველებმა 21:13 მოიგეს, დიდ შესვენებამდე კი ლიდერობას 2 ქულაც წაამატეს და 36:26 დაწინაურდნენ. მეორე ნახევარში ლატვიელებმა ტაქტიკა შეცვალეს და შორ სროლებზე გადავიდნენ, რამაც გაუმართლათ და ჯერ ჩამორჩენა შეამცირეს, ბოლო პერიოდში კი, გადამწყვეტ წუთზე სამქულიანის ხარჯზე, მინიმალური სხვაობით იმარჯვეს. საბოლოოდ, ლატვიელებმა 11 სამქულიანი ჩააგდეს, ჩვენებმა კი მხოლოდ – 4.

საქართველოს ნაკრებში 20 ქულით ბომბარდირი ლაშა მიქელაძე გახდა. ალექსანდრე მერკვილაძემ ორმაგი დუბლი – 12 ქულა და 12 მოხსნა მიითვალა. 10 ქულა და 6 მოხსნა მოაგროვა დაჩი ქავთარაძემ.

საქართველოს ნაკრები მორიგ საკონტროლო მატჩს ესტონეთთან, დღეს, ლატვიის საზღვართან მდებარე ქალაქ პიანუში გამართავს, რის შემდეგაც რუმინეთში, ევროპის ჩემპიონატის B დივიზიონში საასპარეზოდ გაემგზავრება.

www.gbf.ge