“ინდიანა პეისერსმა” NBA-ს საზაფხულო ლიგაში მე-4 მარცხი განიცადა და კვლავაც გოგა ბითაძის გარეშე. წინასწარი ცნობებით, ინდიანელთა მიერ დრაფტზე მე-18 ნომრად აყვანილ ქართველ ცენტრს მხოლოდ სასტარტო შეხვედრა უნდა გამოეტოვებინა, საბოლოოდ კი, ისე გამოვიდა, რომ სავიზო პრობლემების გამო, აშშ-ში ჯერაც არ ჩასულა.

“პეისერსმა” მორიგი შეხვედრა ლიგის მოქმედ ჩემპიონ “ტორონტო რეპტორსთან” ჩაატარა და გასული მატჩების მსგავსად, გამარჯვებასთან ახლოსაც არ ყოფილა – 79:94. ინდიანელთა რიგებში საუკეთესო აარონ ჰოლიდეი იყო, რომელმაც 23 ქულა ჩააგდო.
საინტერესოა, რომ “ინდიანა” “ლოს ანჟელეს ლეიკერსისა” და ხორვატიის ნაკრების გარდა, ერთადერთი გუნდია, რომელმაც ლას ვეგასში გამართულ საზაფხულო ლიგაზე ოთხივე მატჩი დათმო. შეგახსენებთ, რომ “პეისერსმა” გასულ დღეებში “მემფის გრიზლისთან” (75:101), “დეტროიტ პისტონსთანა” (84:102) და “ატლანტა ჰოუქსთან” (67:87) წააგო. სულ ტურნირში 32 გუნდი გახლავთ ჩაბმული.