ფეხბურთი

17:51 | 15.05.2018 | ნანახია [] - ჯერ

ითამაშებს თუ არა დე ვრეი მომავალი გუნდის წინააღმდეგ - ინძაგის თავსატეხი

იტალიის სერია A-ს დასრულებამდე 1 ტურია დარჩენილი და გასარკვევი კიდევ ბევრი საკითხია. მთავარი მაინც ჩემპიონთა ლიგის საგზურია, რომელიც ან რომის “ლაციოს” ერგება, ან მილანის “ინტერს”.

ამ გუნდებს შორის, სხვაობა სამი ქულაა და ბოლო ტურში “სტადიო ოლიმპიკოზე” ერთმანეთს ხვდებიან. “არწივებს” ქულაც ჰყოფნით მიზნისთვის, ხოლო თუ “ნერაძური” გაიმარჯვებს, თავად ითამაშებს დამდეგ სეზონში ჩემპიონთა ლიგაზე.

“ლაციალეს” მთავარ მწვრთნელ სიმონე ინძაგის საფიქრალი არ აკლია, მაგრამ ერთი განსაკუთრებით აქვს: ათამაშოს თუ არა სტეფან დე ვრეი.

ჰოლანდიელი ფეხბურთელი “ლაციოს” ტოვებს და 1 ივლისიდან “ინტერის” ფეხბურთელი გახდება, რომელსაც თავისუფალი აგენტის სტატუსით შეუერთდება. აღნიშნული ინფორმაცია მილანელთა სპორტულმა დირექტორმა პიერო აუზილიომაც დაადასტურა:

“დე ვრეი ჩვენი ფეხბურთელი გახდება. “ლაციოსთან” შეთანხმება ჯერ კიდევ მარტში შედგა”, - თქვა აუზილიომ.

ახლა საინტერესოა, რა მოხდება დე ვრეის მოედანზე გასვლის შემთხვევაში – მან უნდა ითამაშოს იმ გუნდის მაისურით კონკრეტული ერთი მატჩი, რომელსაც საფინალო სასტვენის შემდეგ დატოვებს და უნდა ითამაშოს იმ გუნდის წინააღმდეგ, რომელსაც შეუერთდება. ეს მართლაც საინტერესო დილემაა.

ინძაგის კი, მოსაფიქრებლად დრო ჯერაც აქვს. ამ თემაზე იტალიელმა მწვრთნელმა ასეტი კომენტარი გააკეთა:

“არ ვიცი გავა თუ არა მოედანზე დე ვრეი, სწორი გადაწყვეტილება უნდა მივიღოთ. სტეფანი ნამდვილი პროფესიონალია და არ გამოვრიცხავ, რომ ჩვეულად ძირითად შემადგენლობაში იყოს”, - განაცხადა ინძაგიმ.

აღსანიშნავია, რომ სტეფან დე ვრეი “ლაციოს” დაცვის ხაზის ლიდერია და თუ ის მოედანზე არ გავა, “ლაციოს” უკანა ხაზს შესაძლოა პრობლემები ასეთ შემთხვევაშიც შეექმნას.

0.144738