“ლივერპულის” მთავარი მწვრთნელის იურგენ კლოპის განცხადებით, “მანჩესტერ სიტისთან” ჩემპიონთა ლიგის მეოთხედფინალში მისი გუნდი ბევრს განწირული ეგონა, თუმცა პირველ მატჩში მოპოვებულმა გამარჯვებამ (3:0) ამგვარი მოლოდინი გააქარწყლა და ახლა ლივერპულელებმა ყველაფერი უნდა გააკეთონ, კარგად დაწყებული საქმე ბოლომდე რომ მიიყვანონ.

“ყველაფერი ისე რომ წასულიყო, როგორც ბევრი ვარაუდობდა, ახლა თითქმის გამოთიშული ვიქნებოდით ჩემპიონთა ლიგას და საპასუხო მატჩში მხოლოდ ღირსების დასაცავად მოგვიწევდა თამაში. მაგრამ ახლა სხვა სიტუაციაა, რომელიც ჩვენი შესანიშნავი თამაშით შევქმენით და უნდა გამოვიყენოთ. როცა სეზონის დასაწყისში მანჩესტერში 0:5 დავმარცხდით, დავრწმუნდი, რომ ეს ბრწყინვალე გუნდი იყო, თუმცა იდეალური საფეხბურთო გუნდი არ არსებობს. თამაში არ გიტოვებს შანსს, რომ იდეალური იყო. აქამდეც ვიცოდი, რომ მათ გოლების გაშვება შეეძლოთ. თუმცა, ჩვენც შეიძლება გავუშვათ და დავმარცხდეთ. ამიტომ, ისევ ჩვენი ფეხბურთი უნდა ვითამაშოთ და საქმე ბოლომდე მივიყვანოთ” - აცხადებს კლოპი.

“მანჩესტერ სიტისა” და “ლივერპულს” შორის ჩემპიონთა ლიგის მეოთხედფინალური ეტაპის საპასუხო მატჩი დღეს, მანჩესტერში, თბილისის დროით 22:45 საათზე დაიწყება.