პოლონეთის თასის ნახევარფინალში ქართული დაპირისპირება შედგა. ნიკა კაჭარავას “კორონამ” საკუთარ მოედანზე ლუკა ზარანდიას “არკა” 2:1 დაამარცხა და ფინალისკენ საწყისი ნაბიჯი გადადგა. კაჭარავა ძირითად შემადგენლობაში იყო და ბოლომდეც ითამაშა, ხოლო ლუკა მოედანზე 46-ე წუთიდან გამოჩნდა.
სასიამოვნოა, რომ ორივე ქართველი მთავარ როლებში იყვნენ: კაჭარავამ დუბლი გაიფორმა (მე-14 და 70-ე წუთებზე), ხოლო ზარანდიამ 81-ე წუთზე დალაშქრა მასპინძელთა კარი და თავის გუნდს მეორე თამაშის წინ მშვენიერი შანსი დაუტოვა.
კაჭარავამ ჯერ ახლო მანძილიდან მეკარის მოგერიუბულ ბურთს დაამატა თავით, ხოლო შემდეგ თანაგუნდელის დარტყმული მოხვდა და გოლიც მის ანგარიშზე ჩაიწერა. რაც შეეხება ზარანდიას - ლუკამ მეტოქეს მოედნის ცენტრში მოპარა ბურთი და დრიბლინგი გოლით დაასრულა.
ამ გუნდებს შორის საპასუხო მატჩი 17 აპრილს გაიმართება. აქვე გეტყვით, რომ “არკა” პოლონეთის თასის მოქმედი მფლობელია. მეორე ნახევარფინალურ წყვილში კი, “გორნიკი” შინ “ლეგიას” დაუზავდა (1:1).
