ფეხბურთი

16:07 | 19.03.2018 | ნანახია [] - ჯერ

კოსტაკურტამ ანჩელოტი რომს შეადარა, რომელიც შესაძლოა დაეცეს...

მსოფლიოს ჩემპიონატის შესარჩევ პლეი-ოფში იტალიის ეროვნული ნაკრების ფიასკოსა და მთავარი მწვრთნელის დათხოვნის შემდგომ ახალ კანდიდატებზე ბევრს საუბრობენ, მიუხედავად იმისა, რომ ნაკრებს ამჟამად ლუიჯი დი ბიაჯო წვრთნის და არაა გამორიცხული მასთან სრულფასოვანი კონტრაქტიც გაფორმდეს.

ყველა, ვისაც ამ საქმეზე ხელი მიუწვდება, ცდილობს საკუთარი კანდიდატურა დაასახელოს, თუმცა მწვრთნელებს შორის ყველაზე დიდი პოპულარობით, როგორც ჩანს, კარლო ანჩელოტი სარგებლობს, რომელიც ერთ დროს მის მიერ გაწვრთნილმა მოთამაშემ და ამჟამად იტალიის ფეხბურთის ფედერაციის თანამშრომელმა ალესანდრო კოსტაკურტამ სასურველ კანდიდატად კიდევ ერთხელ წარადგინა.

თავად კარლო ანჩელოტი გადაწყვეტილების მიღებას არ ჩქარობს. როგორც არაერთხელ დაიწერა, მას ნაკრების თავკაცობის პერსპექტივა სულაც არ ხიბლავს და უფრო საკლუბო დონეზე საქმიანობა სურს. განაცხადა კიდევაც, რომ ყოველდღიურ რეჟიმში მუშაობა უნდა.

იტალიის ფეხბურთის ფედერაციის ვიცეკომისარმა ალესანდრო კოსტაკურტამ ამ თემასთან დაკავშირებით Rai-ს მიერ დასმულ კითხვას - დარჩება თუ არა დი ბიაჯო პოსტზე ამხანაგური მატჩების შემდგომ, შემდეგნაირად უპასუხა:

“ეს არის მწვრთნელი, რომელიც კარგად იცნობს ბიჭებს და ის ძალიან კარგად მუშაობს. ვფიქრობ, მას შეუძლია ნაკრების გაწვრთნა, თუმცა არ ვიცით რა მოხდება აპრილის შემდგომ.

ოცნება ყოველთვის კარლო ანჩელოტია, ხუმრობით განაცხადა კოსტაკურტამ. ეს ძალიან დელიკატური მომენტია. ჩვენ ყველამ ვიცით, რომ ძალიან ბევრ სახელს და გვარს უკავშირებენ ნაკრებს. იმედი მაქვს, კარლო ჩვენთვის ხელმისაწვდომი იქნება - როგორც ამბობენ, რომი შესაძლოა დაეცეს...

საბოლოოდ, მწვრთნელის საკითხი მაისში გადაწყდება და ამას თქვენც ჩვენთან ერთად გაიგებთ” – განაცხადა იტალიელმა.

შეგახსენებთ, რომ “სკუადრა აძურას” მთავარი მწვრთნელის პოსტზე კარლო ანჩელოტის გარდა, ანტონიო კონტეს, რობერტო მანჩინისა და მასიმილიანო ალეგრის კანდიდატურებიც განიხილება.

0.109769