საქართველოს ძალოსანთა ნაკრების წევრმა რევაზ დავითაძემ (85 კგ) ანაჰაიმში მიმდინარე მსოფლიოს ჩემპიონატზე მე-5 ადგილი დაიკავა. ახალგაზრდებს შორის ევროპის მოქმედმა ჩემპიონმა ატაცი უჩვეულოდ დაბალი წონით – 160 კილოგრამით დაასრულა და პირველ მოძრაობაში მე-5 შედეგი აჩვენა. აკვრაში კი 191 კილოგრამით პირადი რეკორდი გაიმეორა და ორჭიდის ჯამში 351 კილოგრამი მოაგროვა.

85 კილოგრამ წონით კატეგორიაში მსოფლიოს ჩემპიონი ჩილელი ერლი მენდეს პერესი გახდა, 378 კილოგრამით. ვერცხლის და ბრინჯაოს მედლებს კი პოლონელი კრჟიშტოფ მაციეჟ ზვარიჩი (359 კგ) და იტალიელი ანტონიო პიცოლატო (358 კგ) დაეუფლნენ.

საქართველოს ნაკრები ამერიკის შეერთებულ შტატებში სულ ოთხი სპორტსმენითაა ჩასული. დავითაძის გარდა მსოფლიოს კონკურენციაში უკვე ჩაერთო შოთა მიშველიძე (62 კგ) და ბრინჯაოს მედალიც მოიპოვა.

ხვალ დილით, თბილისის დროით 07:55 საათზე ფიცარნაგზე საქართველოს ქალთა ნაკრების წევრი ანასტასია გოტფრიდი (90 კგ) გავა. ზეგ კი, 05:25 საათზე მძიმეწონოსან მამაკაცთა შეჯიბრება დაიწყება და შტანგას ოლიმპიური, მსოფლიოსა და ევროპის ჩემპიონი ლაშა ტალახაძე ასწევს.

ძალოსნობა

მსოფლიოს ჩემპიონატი

ანაჰაიმი. აშშ

3 დეკემბერი

მამაკაცები

85 კგ

1 ერლი მენდეს პერესი (ჩილე) 378 კგ (175+203)

2 კრჟიშტოფ ზვარიჩი (პოლონეთი) 359 კგ (162+197)

3 ანტონიო პიცოლატო (იტალია) 358 კგ (162+197)

5 რევაზ დავითაძე (საქართველო) 351 კგ (160+191)