ინგლისის ეროვნული ნაკრების მთავარი მწვრთნელის მოვალეობის შემსრულებელს გარეტ საუთგეიტს და გუნდის კაპიტანს უეინ რუნის სხვადასხვა ფინანსური სქემების გამოყენებით გადასახადებისთვის თავის არიდებაში ადანაშულებენ.

როგორც The Mirror-ი იტყობინება, საუთგეიტი იმ 400 ეჭვმიტანილს შორის მოხვდა, ვინც საინვესტიციო კომპანია Ingenious-თან თანამშრომლობდა. წყაროს ცნობით, ეჭვმიტანილები, აღნიშნული კომპანიის მეშვეობით, სხვადასხვა პროექტების ინვესტირებას ახდენდნენ, მერე კი ხელოვნურად დაფიქსირებული ზარალის გამო თანხები უკან უბრუნდებოდათ.

აღსანიშნავია, რომ საუთგეიტი ახლახან დაინიშნა ინგლისის ნაკრების მთავარი მწვრთნელის მოვალეობის შემსრულებლად, მას შემდეგ, რაც კორუფციული სკანდალის გამო სემ ელერდაისს მოუწია თანამდებობის დატოვება.

საინვესტიციო სქემების გამოყენებით გადასახადებისთვის თავის არიდებაში ადანაშაულებენ უეინ რუნისაც. The Times-ის ინფორმაციით, “მანჩესტერ იუნაიტედისა” და ინგლისის ნაკრების შემტევმა ბოლო ხუთი წლის განმავლობაში სხვადასხვა კომპანიის დახმარებით ოთხჯერ განახორციელა თანხის ინვესტირება, რათა გადასახადებისთვის თავი აერიდებინა. თუკი რუნის დანაშაული დაუმტკიცდება, ბრიტანეთის საგადასახადო სამსახურისგან 3,5 მილიონი გირვანქა სტერლინგის ოდენობით ჯარიმა დაეკისრება.