გიორგი მერებაშვილმა მიმდინარე სეზონი საკმაოდ კარგად დაიწყო. 30 წლის შემტევი ნახევარმცველი ზაფხულში ბერძნული “ლევადიაკოსიდან” წავიდა და პოლონეთს მიაშურა, სადაც პლოცკის “ვისლას” მაისური მოირგო. გიორგიმ პოლონური გუნდის ვებგვერდს ვრცელი ინტერვიუ მისცა, რომელშიც თავისი კარიერის განვლილ წლებს შეეხო. ამასთან, ისაუბრა იმ მოტივებზე, რის გამოც “ვილსაში” არჩია გადაბარგება და საქართველოს შესახებ.

აღსანიშნავია, რომ მერებაშვილი პლოცკის “ვისლას” ისტორიაში მეორე ქართველი ფეხბურთელია. მანამდე პლოცკელთა ღირსებას წლების განმავლობაში მამია ჯიქია იცავდა.

“მე ვფიქრობ, რომ პოლონეთში საუკეთესო ჩემპიონატია, სადაც აქამდე მითამაშია. არამხოლოდ საფეხბურთო დონით, არამედ ვიზუალურად – სტადიონები, ინფრასტუქტურა, გულშემატკივრები, გაშუქება მედიის მხრიდან – ამ კუთხით, ნამდვილად საუკეთესოა.

მართალია, ექსტრაკლასაში თამაშის გამოცდილება არ მქონდა, მაგრამ სანამ “ვისლას” შემოთავაზებას დავთანხმდებოდი, მანამდე ჩემს მეგობრებს, ნიკა ძალამიძესა და ვლადიმერ დვალიშვილს ვესაუბრე – მათ პოლონეთი დადებითად დამიხასიათეს და მიუხედავად იმისა, რომ შემოთავაზებები სხვა ქვეყნებიდანაც მქონდა, მათი რჩევის გამო გადავწყვიტე ეს ნაბიჯი გადამედგა.

საქართველოში ჩასვლას აუცილებლად გირჩევთ – ეს არის პატარა, მაგრამ ძალიან ლამაზი ქვეყანა, სტუმართმოყვარე, კარგი ხალხით, ლამაზი ადგილებით სავსეა, ბევრი ისტორიული ძეგლიცაა. ჩემს სიტყვებში რომ დარწმუნდეთ, აუცილებლად უნდა ჩახვიდეთ საქართველოში”, - უთხრა მერებაშვილმა “ვისლას” ვებგვერდს.

შეგახსენებთ, გიორგი მერებაშვილმა “ვილსას” მაისურით ექსტრაკლასაში 7 მატჩი ჩაატარა და 2 გოლის გატანა შესძლო. მისი გუნდი კი, 9 ტურში მოპოვებული 14 ქულით მეხუთე ადგილზეა და ლიდერ “იაგიელონიას” 5 ქულით ჩამორჩება.