ლონდონის “ვესტ ჰემმა” ევროპის ლიგის საგზური მოიპოვა. ინგლისის მძლავრი გუნდების გარემოცვაში “ჩაქუჩები” ამას ხშირად ვერ ახერხებენ, ამიტომაც, საერთო აზრით, სლავენ ბილიჩის გუნდის წარმატება მოულოდნელობად მიიჩნიეს.

Dailymail-ი იხსენებს “ვესტ ჰემის” ევროპულ გამოსვლებს და საკმაო ადგილს უთმობს თბილისის “დინამოსთან” 1981 წელს ჩატარებულ საშინაო მატჩს. თბილისელებმა იმ დღეს “კონცერტი” გამართეს “აპტონ პარკზე” და 4:1 მოიგეს (VIDEO). ეს თასების თასის მეოთხედფინალის პირველი მატჩი იყო, იმ წელს დინამოელებმა “ვესტ ჰემს” “ფეიენოორდი” და “კარლ ცაისი” მიაყოლეს და თასიც აღმართეს.

წერენ ალექსანდრე ჩივაძეზე, ლეგენდარულ კაპიტანზე, რომელმაც თავისი ნახევრიდან წაიღო ბურთი და დაახლოებით 30 მეტრიდან ძლიერი დარტყმით გაუტანა ფილ პარქსს. სხვათა შორის, პარქსი იმ პერიოდში ევროპაში ყველაზე ძვირადღირებული მეკარე ყოფილა.

“ისეთი თამაში იყო, “ვესტ ჰემს” შეიძლებოდა 1:24 წაეგო” – წერს ცნობილი ბრიტანული გამოცემა.