საქართველოს 20-წლამდე კალათბურთელთა ნაკრებმა ევროპის ჩემპიონატის „ბ“ დივიზიონში ჯგუფური ეტაპი დაასრულა. ქართველების ბოლო მეტოქე ჯგუფის ლიდერი მონტენეგრო იყო. ჩვენს მეტოქეს წაგების შემთხვევაშიც კი პირველობა განაღდებული ჰქონდა, საქართველო კი მოგებითაც ვერ აღწევდა თავს ბოლო ადგილს.

ფავორიტად მიჩნეულმა მონტენეგრომ მოსალოდნელი გამარჯვება მოიპოვა. ქართველებმა წინააღმდეგობა ვერ გაუწიეს ბალკანელებს და პირველივე წუთებიდან ჩამორჩნენ. საწყისი პერიოდი მონტენეგროელებმა 35:13 მოიგეს, ხოლო დიდი შესვენებისთვის თამაშის ბედი ფაქტობრივად გადაწყვიტეს - 60:29 დაწინაურდნენ.

მეორე ტაიმში ვითარება არ შეცვლილა. ბალკანელებმა დომინირება გააგრძელეს და საბოლოოდ დამაჯერებელი გამარჯვება მოიპოვეს - 100:59. მონტენეგროს მწვრთნელმა სათამაშო დრო ყველას თითქმის თანაბრად გადაუნაწილა. 12-ივე მონტენეგროელმა 10-20 წუთის გარგლებში ითამაშა. ქართველების დამრიგებელმა დავით უსტიაშვილმა კი ყველა ვერ დატვირთა. გუნდის ერთ-ერთი ლიდერი კახა ტომარაძე ტრავმის გამო მოედანზე ვერ გავიდა.

საქართველოს ნაკრები 9-18 ადგილებისთვის მებრძოლ საკვალიფიკაციო ჯგუფში გადაერთო, სადაც ჩვენი ჯგუფიდან ვერგასული პორტუგალია და კოსოვო, ასევე „ა“ ჯგუფში ჩარჩენილი რუმინეთი და ავსტრია არიან. სწორედ ამ 2 უკანასკნელთან ითამაშებს საქართველოს ნაკრები, ხოლო კოსოვოსთან და პორტუგალიასთან პირველ ჯგუფურ ეტაპზე ნათამაშევი მატჩის შედეგები (55:57, 65:77) საკვალიფიკაციო ჯგუფში გადაჰყვება.

საკვალიფიკაციო ჯგუფის დასრულების შემდეგ გუნდები მეორე ჯგუფში პარალელურ ადგილებზე გასულ გუნდებს დაუპირისპირდებიან. ვთქვათ, ქართველებმა საკვალიფიკაციოში პირველი ადგილი რომ დაიკავონ, მეორე ჯგუფის პირველადგილოსანს მე-9 ადგილისთვის მატჩში შეხვდებიან. ჯგუფში მეორე ადგილის დაკავების შემთხვევაში შესაბამისად მე-11 ადგილისთვის ითამაშებენ და ასე შემდეგ...

ევროპის U20 ჩემპიონატი. B დივიზიონი. სეკეშფეხერვარი. უნგრეთი. 13 ივლისი

მონტენეგრო 100:59 საქართველო (35:13, 25:16, 24:17, 16:13)

სრული სტატისტიკა: 100:59

15 ივლისი

17:45 ავსტრია - საქართველო

16 ივლისი

15:30 რუმინეთი - საქართველო

www.gbf.ge