სადღეისოდ მსოფლიოს ნომერ პირველი ჩოგბურთელის, ბელარუსი ვიკტორია აზარენკას გამარჯვებით დასრულდა აშშ-ის კალიფორნიის შტატის ინდიან უელსის “მასტერზ1000”-ის ტურნირი. ფინალში აზარენკა მეორე ნომრად განთესილ რუს მარია შარაპოვას შეხვდა და ამ შეჯიბრების 2006 წლის ჩემპიონი საათსა და 26 წუთში საკმაოდ იოლად 6:2, 6:3 დაამარცხა, თავად კი პირველად დაისაკუთრა კალიფორნიული ასპარეზობის მთავარი პრიზი. ვიკტორიამ 6 ბრეიკ-პოინტი განახორციელა, ხოლო საკუთარ მოწოდებაზე 2 გეიმი წააგო. აზარენკასთვის ინდიან უელსის ტურნირზე მოგება 12-ე ტიტულია, ამასთან წლეულს ბელარუსმა მეოთხე წოდება დაიმსახურა. მიმდინარე სეზონში ვიკამ ზედიზედ 23 მატჩი მოიგო.