ანა ტატიშვილმა კვებეკის საერთაშორისო ტურნირის (საპრიზო ფონდი 220 ათასი დოლარი) მე-2 წრეშიც დამაჯერებელი გამარჯვება იზეიმა და ”ჩელენჯ ბელის” მეოხედფინალში გააღწია, რისი წყალობითაც რეიტინგს 70 ქულა შემატა.
მერვედფინალურ შეხვედრაში ქართველი ჩოგბურთელის მეტოქე მე-7 ნომრად განთესილი პეტრა მარტიჩი გახლდათ, რომელთან დაპირისპირებაც საათს და 18 წუთს გაგრძელდა. ტატიშვილმა 2 ეისი მოაწოდა, 6 ორმაგი შეცდომა დაუშვა და 11-დან 7 ბრეიკ-პოინტი გამოიყენა, თავად კი მოწოდება სამჯერ დათმო და 6:2, 6:3 იმარჯვა.
შეგახსენებთ, რომ 22 წლის ტატიშვილს ქალთა საჩოგბურთო ასოციაციის (WTA) რეიტინგში 1170 ქულით 52-ე ადგილი უკავია, 70 ქულის შემატებით კი დიდი ალბათობით მსოფლიოს საუკეთესო ორმოცდაათეულში შეაღწევს.
მეოთხედფინალში ქართველი ჩოგბურთელის მეტოქე 26 წლის ბელგიელი კირსტენ ფლიპკენსი (102-ე) იქნება, რომელმაც ხორვატი მირიანა ლუჩიჩი (113-ე) 6:7 (2:7), 6:2, 6:4 დაამარცხა. თუკი ანამ მომავალ თამაშშიც იმარჯვა, მარაგს უკვე 130 ქულას შემატებს. აქვე ვთქვათ, რომ კვებეკის ტურნირის ფინალში გასვლა 200 ქულას იძლევა, ჩემპიონი კი 280 ქულით დასაჩუქრდება.
და ერთიც. აშშ-ს ღია პირველობის შემდეგ, ბოლო პერიოდში ტატიშვილის თამაშის ყურების საშუალება კიდევ ერთხელ მოგვეცა და აუცილებლად უნდა აღინიშნოს, რომ ანას ასპარეზობაში წინსვლა აშკარაა. ახლა, მთავარია, მან ეს პროგრესი შეინარჩუნოს.

დათო მანჯავიძე