მადრიდის “რეალის” ლიდერი კრიშტიანუ რონალდუ მის ყოფილ დამრიგებელზე, ამჟამად “ჩელსის” მთავარ მწვრთნელზე, ჟოზე მოურინიოზე საუბრობს და თანამემამულეს არცთუ კარგად მოიხსენიებს.
“რეალიდან” წასვლის შემდეგ, მოურინიომ განაცხადა, რომ კრიშტიანუ რონალდუს თავი ყოვლისმცოდნე ჰგონია. ახლახანს, “ჩელსის” დამრიგებელმა სიამაყით თქვა, რომ მას რონალდოსთან უმუშავია, ოღონდ ნამდვილ რონალდოსთან, ბრაზილიელთან. თანამემამულის სიტყვების კომენტირება რონალდუს სთხოვეს. “არის საკითხები, რომელთა კომენტირებაც არ ღირს. ერთ-ერთი მათგანია ის, რაც მოურინიომ თქვა. მწვრთნელებთან კონფლიქტს ყოველთვის ვერიდებოდი. არ ვაპირებ ვუკბინო ხელს, რომელიც მაჭმევს და არ მსურს ვისაუბრო ადამიანზე, რომელიც ჩირქს მცხებს. ვცდილობ, აქცენტი პოზიტიურ საკითხებზე გავაკეთო.”
სულ მალე, “რეალი” ჟოზე მოურინიოს “ჩელსის” ამხანაგურად გაეჯიბრება. რონალდუ კომენტარს ამ თამაშზეც აკეთებს. “ამხანაგურ მატჩს “ჩელსის” წინააღმდეგ ვმართავთ და არა ლონდონელთა მწვრთნელის წინააღმდეგ. ესაა ერთი მორიგი მატჩი, რომლის მოგებასაც ვაპირებთ.” – ციტირებს რონალდუს სიტყვებს Marca.
