ფეხბურთი

19:42 | 2.12.2010 | ნანახია [] - ჯერ

მუნდიალის მასპინძლები გაირკვა: 2018 - რუსეთი, 2022 - ყატარი

მსოფლიოს 2018 და 2022 წლის ჩემპიონატების მასპინძელი ქვეყნების ვინაობა გარკვეულია. 8 წელიწადში უმთავრეს საფეხბურთო მოვლენას ჩვენი ჩრდილო მეზობლები, რუსები უმასპინძლებენ. კიდევ 4 წლის შემდეგ, მსოფლიოს ჩემპიონატი ყატარში გაიმართება.
2018 წლის მუნდიალის მასპინძლობაში რუსეთს კონკურენციას 3 კანდიდატი უწევდა. ერთ-ერთი მათგანი იყო ფეხბურთის სამშობლო ინგლისი, დანარჩენ კანდიდატებს კი ბელგია-ჰოლანდია და პორტუგალია-ესპანეთში წყვილებად წარმოადგენდნენ. ამ ოთხეულიდან ერთ-ერთი ფავორიტი სწორედ რუსეთი იყო, ამიტომ ფიფას აღმასრულებელი კომიტეტის გადაწყვეტილება მოულოდნელი არ ყოფილა.
“თქვენ ჩვენ გვანდეთ მსოფლიოს ჩემპიონატის მასპინძლობა და იმედებს არ გაგიცრუებთ. შევქმნათ ისტორია ერთად” – ასეთი კომენტარი გააკეთა სასურველი გადაწყვეტილების მოსმენის შემდეგ რუსეთის პრემიერმინისტრის პირველმა მოადგილემ, იგორ შუვალოვმა.
რაც შეეხება 2022 წლის მუნდიალს, ამ შემთხვევაში კანდიდატი 5 იყო. აწ უკვე გამარჯვებულ ყატარს კონკურენციას ამერიკის შეერთებული შტატები, ავსტრალია, იაპონია და სამხრეთ კორეა უწევდნენ.
“მადლობას გიხდით ნდობის გამოცხადებისთვის, ფეხბურთის საზღვრების გაფართოებისთვის და ყატარისთვის შანსის მიცემისთვის. გპირდებით, სიამაყის გრძნობა გექნებათ ამ გადაწყვეტილების მიღების გამო” – განაცხადა საბოლოო გადაწყვეტილების მოსმენის შემდეგ ყატარელმა შეიხმა, მოჰამედ ბინ ჰამად ალ-თანიმ.
აქვე აღვნიშნავთ, რომ არც რუსეთს და არც ყატარს აქამდე ასეთი დონის საფეხბურთო ტურნირისთვის არ უმასპინძლიათ. თუ რუსეთმა იცის მაინც, რა ხილია მსოფლიოს ჩემპიონატი (ჩვენს ჩრდილო მეზობლემს ამ ტურნირზე 2-ჯერ აქვთ ნათამაშები), ყატარის მაქსიმუმი ყოველთვის მუნდიალის საკვალიფიკაციო ეტაპზე თამაში იყო ხოლმე.

0.15195