ქართველი მოჭადრაკე, სალომე მელია (2449) რომელსაც გიბრალტარის პრესტიჟულ ტურნირზე 61-ე რეიტინგი გააჩნია, 7 ტურის თავზე მე-7 ადგილზე დამკვიდრდა და ერთპიროვნულ ლიდერს, უძლიერეს უკრაინელ ვასილი ივანჩუკს (2764) მხოლოდ ნახევარი ქულით ჩამორჩება.
მელიას წინსვლა ბოლო ტურში მოპოვებულმა გამარჯვებამ განაპირობა, როდესაც მან თანამემამულე გიორგი ყაჭეიშვილს (2585) თეთრი ფიგურებით სენსაციურად სძლია და თავი 5.5 ქულას მოუყარა.
ასეთივე მონაგარი კიდევ ხუთ მოჭადრაკეს – ნაიჯელ შორტს (ინგლისი, 2658), დანიელ ფრიდმანს (გერმანია, 2655), მიხაელ როიზს (ისრაელი, 2649), ნარაიანან გეეტა გოპალსა (ინდოეთი, 2597) და ვიქტორ მიხალევსკის (ისრაელი, 2579) გააჩნია, რომლებიც სალომეს დამატებითი მაჩვენებლებით უსწრებენ, ამდენად, როგორც აღვნიშნეთ, ქართველი მოჭადრაკე მე-7 ადგილზეა.
ყაჭეიშვილს 4.5 ქულა შერჩა და 37-ე პოზიციამდე დაქვეითდა. ასევე 4.5 ქულა გააჩნია ნანა ძაგნიძესაც, რომელმაც შავი ფიგურებით ზემოაღნიშნულ გოპალთან წააგო და 30-ე საფეხურზე აღმოჩნდა.
მე-8 ტურში, ქართველი მოჭადრაკეები შავებით ითამაშებენ. მელიას მეტოქე გერმანელი ფრიდმანია, ყაჭეიშვილი ფრანგ გაბრიელ ბატალინის (2437) დაუპირისპირდებ, ხოლო ძაგნიძე – რუს ალექსეი სავინს (2417). ცენტრალური ივანჩუკისა და როიზის პარტია იქნება.
ცნობისთვის, საჭადრაკო ფესტივალი 10 ტურად მიმდინარეობს და 3 თებერვალს დასრულდება, ჯამური საპრიზო ფონდი კი, 126 ათასი გირვანქაა, საიდანაც ჩემპიონი 17 500-ს მიიღებს, ხოლო სულ პრიზები მოწინავე თორმეტეულს ერგება.
ტურნირზე უკვე მოეწყო ბლიც-შეჯიბრი, რომელშიც ქართველთაგან მონაწილეობას მხოლოდ მელია იღებდა. სალომე გუნდ “ინტერნაციონალში” მოხვდა, სადაც ხსენებულ ფრიდმანთან, ამერიკელ ანა ზატონსკიხთან (2470) და გერმანელ აჩიმ ილნერთან (2345) ერთად თანაშობდა.
“ინტერნაციონალმა” 6 ტურში, 2 შეხვედრა მოიგო, 2 ყაიმით დაასრულა და 2-შიც მარცხი განიცადა, რის შემდეგაც 6 ქულით, 10 გუნდს შორის მე-6 ადგილი დაიკავა. რაც შეეხება მელიას, მან 6 პარტიაში, 3 გამარჯვება მიითვალა, ერთხელ ზავი გააფორმა, ფრანგ ბატალინისთან და ლუქსემბურგელ ვებერთან (2314) კი - მარცხი განიცადა.