სტატიები

17:59 | 12.09.2011 | ნანახია [] - ჯერ

გერმან ზონინი თბილისის "დინამოში" გატარებულ პერიოდზე

თბილისის "დინამოს" ყოფილ მთავარი მწვრთნელ გერმან ზონინს 9 სექტემბერს 85 წელი შეუსრულდა. ua-football-ზე ზონინის ვრცელი ინტერვიუ გამოქვეყნდა, რომელშიც მწვრთნელი "დინამოში" გატარებულ პერიოდსაც იხსენებს.
"სადაც უნდა მემუშავა, ყველგან რკინის დისციპლინა იყო. ერთხელ, თბილისის "დინამოში" მუშაობისას, რამაზ შენგელიამ და თენგიზ სულაქველიძემ ვარჯიშზე მოწყობისას 30 წამი დააგვიანეს. გუნდის უფროს ვლადიმერ გუცაევს ვუთხარი, რომ ისინი უნდა დამეჯარიმებინა. ფეხბურთელებმა, რა თქმა უნდა, წინააღმდეგობა გამიწიეს, მაგრამ მათ ვუთხარი: "ხომ დააგვიანეთ?" მიპასუხეს: "დიახ". მაშინ გადაიხადეთ...…ისიც მივამატე, თუ მე დავაგვიანებ, თქვენც ასე მომექეცით-მეთქი. მეორე დღეს ვხედავ, შენგელია და სულაქველიძე 20 წუთით ადრე დგანან მწყობრში და სხვებსაც ასწორებენ. ასე იდგნენ დიდხანს. მე 30 წამით ადრე გამოვდივარ და ვეკითხები გუნდს – "როგორ ხართ, ქართველებო?" სიცილი დაიწყეს. მერე გუნდის ყველა პერსონალი მეუბნებოდა, 40 წლის განმავლობაში არ გვინახავს, ქართველები მწყობრში დროულად დამდგარიყვნენო.
...სამჯერადი ვარჯიშები გვქონდა. ყოველი წვრთნის წინ კი, მეთოდური მეცადინეობა იყო. თავის დროზე თემურ ქეცბაიაც ჩემი შეგირდი გახლდათ და მას ვუთხარი, ინსტიტუტისთვის წიგნი აიღე და ერთ თვეში გამოგკითხავ-მეთქი. ერთ თვეში მოვიდა და მითხრა, ყველაფერი ვისწავლეო. წიგნი მოვატანინე, გადავშალე და აღმოჩნდა, რომ ქეცბაიას მხოლოდ შესავალი უსწავლია. ვეკითხები: "ასე გინდა ჩაბარება?" თემურმაც, ყველაფერი უკვე ჩაბარებულია, ნიშნები დამიწერესო. ჩავხედე და მართლა დაუწერიათ. აი, ასე, ისინი ყველაფერს აბარებდნენ.
...ფეხბურთელებს ვზრდიდი და ცხოვრებას ვასწავლიდი. მათი პირადი ცხოვრებაც მაინტერესებდა. გელა კეტაშვილი მე მოვამზადე ნაკრებისთვის და 1988 წელს ანატოლი ბიშოვეცის გუნდში ოლიმპიური ჩემპიონი გახდა. ერთხელაც, თამაშის შემდეგ აღმდგენი პროცუდურა უნდა გვქონოდა და კეტაშვილი არ ჩანს. ბოლოს გადავწყვიტე, მის სახლში დამერეკა. ყურმილი გელას ცოლმა აიღო და ვეკითხები, ფინანსებს თქვენ ანაწილებთ თუ თვქენი მეუღლე-მეთქი. ვუთხარი, გადაეცით, 10 წუთში თუ არ მოვა ბაზაზე, ყველაზე დაბალი ხელფასი დაენიშნება გუნდში. დათქმულ დროს მოვიდა და თავის მართლება დაიწყო. ვუთხარი, რომ ჩემთან არ იყო საჭირო ასეთები.
...სხვა შემთხვევაც იყო. ზაზა რევიშვილმა დააგვიანა ვარჯიშზე და მითხრა, ნახევარი საათია, ბაზაზე ვარ, უბრალოდ, მანქანას ვრეცხავდიო. არ შევეპუე – დააგვიანე? გადაიხადე!
...ოთარ გაბელია მოდის ვარჯიშზე და "სინიაკი" აქვს. ვეკითხები მიზეზს და მპასუხობს, მანქანით მივდიოდი და საცობის დროს რაღაცას მივარტყიო. როგორც გავიგე, მანქანიდან გადმოსულა და საქმის გარჩევა დაუწყია, ჰოდა, სახეშიც მიუღია... ვუთხარი, შენ კარში ხარ გაბელია, ტრასაზე კი უბრალო მძღოლი, როგორც სხვები-მეთქი. მოკლედ, ყველგან რკინის დისციპლინა მქონდა".
 

 

მოამზადა ილია ნანობაშვილმა
 

Loading...
0.11898