კვირის ბოლოდან ლონდონში სტარტს უიმბლდონის საჩოგბურთო ტურნირი აიღებს და მის ძირითად ბადეში საუკეთესო ქართველი ჩოგბურთელი ანა ტატიშვილიც ჩაებმება, კვალიფიკაციაში კი, ჩვენებურთაგან მხოლოდ მაკა ჩახნაშვილი მოხვდა და პირველივე მატჩი წააგო – 4:6, 0:6 სამხრეთაფრიკელ ჩანელ სიმონდსთან.
შვეიცარიის ქალაქ ლენცერჰეიდეში მიმდინარე 25-ათასიან ტურნირზე სოფო ქვაცაბაიამ პირველი რაუნდის დაძლევა მოახერხა, კვალიფიკაციის კიდევ ერთი გამარჯვებული ეკატერინე გორგოძე კი სლოვენიელ მაშ ზეჩ-პესკირიჩს დაუპირისპირდა და საწყის სეტში გამარჯვების მიუხედავად, 6:3, 3:6, 1:6 დამარცხდა. წყვილთა მეოთხედფინალში ქვაცაბაია და გორგოძე მე-2 ნომრად განთესილ ოზგენსა და ზეჩ-პესკირიჩს ეთამაშებიან.
საფრანგეთის ქალაქ მონპელიეში, ასევე 25-ათასიან ტურნირზე მოასპარეზე სოფო შაფათავა ერთეულთა თანრიგის კვალად, წყვილთა შეჯიბრსაც გამოეთიშა. შაფათავასა და ბელორუსი პოლინა პეხოვას მე-3 ნომრად განთესილმა წყვილმა ფრანგულ დუეტთან (ბელტრამი-ტორპე) 2:6, 6:7 (7:9) წააგო.
წარუმატებლად ითამაშა ოქსანა კალაშნიკოვამაც, რომელიც შვედეთის ქალაქ კრისტინეჰამნის 25-ათასიან ტურნირზე ირჯებოდა. ქართველი ჩოგბურთელი მერვედფინალში ბელორუს ილონა კრემენთან 1:6, 6:7 (5:7) დამარცხდა.