ესპანეთის ეროვნული ნაკრების ნახევარმცველ ჩავი ერნანდესს მსოფლიოს 2014 წლის ჩემპიონატის ფინალში მასპინძელ ბრაზილიის ნაკრებთან თამაში სურს. კონფედერაციის თასის ფინალში განცდილი მარცხის (0:3) შემდეგ, ესპანელებს ბრაზილიელებთან რევანში მათსავე კედლებში სურთ.

“შესაძლოა, ბრაზილიასთან თამაში 1/8-ფინალშივე მოგვიწიოს, მაგრამ იმედია, ეს ფინალში მოხდება. ჩვენ რთული ჯგუფი გვაქვს, მაგრამ არც მათ ჰყავთ სუსტი მეტოქეები. ნებისმიერ შემთხვევაში, ფეხბურთი რევანშის საშუალებას იძლევა. იმედია, ჩვენს შემთხვევაში ეს მუნდიალის ფინალში მოხდება”, - განუცხადა კატალონიის “ბარსელონას” გამთამაშებელმა ფიფას ოფიციალურ საიტს.

შეგახსენებთ, რომ მუნდიალის ჯგუფურ ეტაპზე, ესპანეთის მეტოქეები ჰოლანდიის, ჩილესა და ავსტრალიის ნაკრებები იქნებიან. ბრაზილიის ეროვნული გუნდი ურთიერთობას ხორვატიის, კამერუნისა და მექსიკის ნაკრებებთან გაარკვევს.