საქართველოს მოქმედი ჩემპიონი თბილისის „იბერია“ ჩემპიონთა ლიგის პირველ საკვალიფიკაციო ეტაპზე შვედურ „მალმიოს“ შეხვდება.

წილისყრის შედეგად, მეტოქედ ლევან კორღალიძის გუნდს სწორედ შვედეთის ჩემპიონი ერგო. პირველი მატჩი თბილისში გაიმართება, საპასუხო - მალმიოში.

წყვილში გამარჯვებული გუნდი მეორე საკვალიფიკაციო ეტაპზე გავა და ამასთან ერთად, გაინაღდებს მომდევნო წრეში წარუმატებლობის შემთხვევაში კონფერენს ლიგის პლეი-ოფში თამაშს, ხოლო დამარცხებული კონფერენს ლიგის მეორე საკვალიფიკაციო ეტაპზე გადაერთვება.

ჩემპიონთა ლიგის პირველი საკვალიფიკაციო ეტაპის მატჩები 8-9 ივლისს, ხოლო საპასუხო 15-16 ივლისს გაიმართება.