საქართველოს ეროვნული ლიგის მერვე ტურში თბილისის „იბერიამ“ „გაგრას“ უმასპინძლა, რომელიც დამაჯერებლად 3:1 დაამარცხა.

გიორგი მიქაძის გუნდმა სეზონი შესანიშნავად დაიწყო და როგორც ჩანს, ჩემპიონობის ერთ-ერთი კანდიდატი იქნება. „იბერია“ მე-18 წუთზე შოთა ნონიკაშვილმა დააწინაურა, ხოლო 11 წუთის შემდეგ შეიკნე სილამ სხვაობა ორამდე გაზარდა.

„გაგრამ“ სხვაობა მალევე გიორგი ქიმაძის გოლით შეამცირა, მაგრამ მეორე ტაიმის დასაწყისში ცოტნე კაპანაძემ ორბურთიანი სხვაობა აღადგინა და როგორც გაირკვა, საბოლოო შედეგი დააფიქსირა.

„იბერია“ 19 ქულით გალიდერდა, თუმცა „დინამო ბათუმს“ თამაშით ნაკლები აქვს ჩატარებული. თბილისელები პირველი წრის ბოლო ტურში 15 აპრილს, „სამგურალს“ შეხვდებიან. „გაგრა“ 4 ქულით ბოლო ადგილზეა და წინ „დინამო თბილისთან“ შეხვედრა აქვს.

„იბერია“ – „გაგრა“ 3:1 (2:1)

გოლები: 1:0 ნონიკაშვილი (18), 2:0 სილა (29), 2:1 ქიმაძე (32), 3:1 კაპანაძე (57)